Top 2 sa PMA-Bagwis Class 2012 dili interesado kaniadto sa PMA

CEBU, Philippines - Walay kabutangan sa iyang kalipay ang inahan lakip na ang mga igsuon nga taga Tambis St. , sa barangay Sambag 2 ning dakbayan sa Sugbu nga nahimong top 2 sa 186 ka Philippine Military Academy (PMA) “Bagwis” (Bagong Kawal ng Nag-iisang Lakas) Class of 2012 didto sa Fort Del Pilar, Baguio City.

Si Iris Cabrera, 50, usa ka optometrist ug inahan ni Jose Mari Cabrera, 22, kinsa salutatorian sa PMA Bagwis Class of 2012 nga nahinabi sa Banat News kagahapon sa buntag sa ilang balay misaysay nga nalipay siya sa naabot sa anak.

Matud sa inahan nga sa sinugdanan wala gyud siya magdahom nga maapil sa top graduating cadets ang anak tungod kay dili kaayo maayo ang dagan sa grado sa anak nianang plebo (first year) pa kini.

Diha lang misaka ang grado niini pagka 2nd year  nga gidunganan niya sa pag-ampo nga makalampos kini sa napiling karera sa kinabuhi.

Misaysay si Iris nga sa sinugdanan, ang iyang bayaw nga may importanteng tuyo sa higalang opisyal diha sa Central Command sa barangay Apas maoy nagdala sa application form alang sa entrance examination sa PMA.

“Ang sulti sa opisyal sa akong bayaw, baka meron kang pamangkin (nga gustong mag PMA).”

Sa primero, di interesado si Jose Mari nga mokuha sa pasulit sa PMA apan ang amahan niini nga si Miguel Cabrera, 52, maoy miaghat sa ilang anak ug gikuyogan gyud kini pagkuha sa pasulit diha sa Southwestern University (SWU) ug iyang giatngan sa kabalakang mogawas kini ug dili na motiwas sa exam.

Apan sa resulta nakapasar ang ilang anak hangtud nga nakapasar usab kini sa ubang test sama sa medical examination ug uban pa apan nagpabilin ang pangutana kung interesado ba gihapon kini tungod kay nagkuha man ang anak og kursong accountancy.

Hinuon human masabti sa anak ang mga benepisyo ug prebilihiyo sa PMA nakahukom kining mosulod sa maong prestihiyosong institusyon.

“Ako lang mensahe sa akong anak nga kung giunsa siya pagpataas sa Ginoo, mao unta iyang pagpaubos kay dili mani pasikatay, kanang humble lang gyud siya,” tambag pa sa inahan.

Dugang pa sa inahan nga dili siya makatuo nga makasulod ang iyang anak sa PMA kay pagtapos niini sa high school kuwang kini sa height apan pagsulod niini sa PMA igo ra gyud kining nakapatong sa 5’4” nga maoy limit sa height sa mga lalaking aplikante.

Si Jose Mari, nagtungha og kindergarten sa Daisy ABC Foundation sa San Carlos City, Negros Occidental, sa first year high school diha sa SWU ug pagka second year high school diha na sa Mabolo Christian Academy dayon sa 3rd hangtud 4th year high school diha na sa Cebu Distance Learning Center sa Lahug.

Sa first ug second year college diha sa SWU hangtud nga nasulod na siya sa PMA.

Si Marie Francoise Therese Cabrera Arriba, 24, nga usa ka registered nurse ug nagtrabaho sa call center ug maguwang ni Jose Mari, kinsa ilang gitawag og ‘Baby Boy’ sanglit si Jose Mari lang ang lalaki sa upat ka magsuon, mitug-an nga daan nang utokan ang iyang manghod ug wala na siya masurprisa nga nasulod sa top sa PMA.

Garbo nila ang ilang igsuong si Jose Mari sanglit nakadawat na siya og daghang mga text ingon man nag-post sa iyang Facebook nga nag congratulate kaniya human masayod ang iyang mga higala nga na-top ang iyang manghod.  - BANAT NEWS