CEBU, Philippines - Upat ka mga tawo ang nalandig sa tambalanan human ang ilang gisakyan nga multicab nagkabinanggaay sa usa ka awto diha sa eskina sa dalan J. Luna ug Andres Soriano sa barangay Mabolo niadtong Domingo sa kaadlawon.
Ang upat ka mga biktima giilang sila si Sheila Marie Orongan;Jake Orongan; Raul Orongan ug Genaro Orongan pulos nagpuyo sa sitio Alang-Alang sa barangay Estancia sa dakbayan sa Mandaue.
Si SPO1 Anthony Deligero sa Traffic Division sa Cebu City Police Office (CCPO) nga nahinabi sa Banat News sa telepono kagahapon sa buntag nagkanayon nga nagsakay ang mga biktima sa multicab nagtangag sa plaka GLP-622 nga gimaneho ni Reynaldo Orongan, Carahay nga taga barangay Gun-ob sa dakbayan sa Lapulapu.
Samtang ang awtong nakabangga kanila nga Toyota Vios nagtangag sa plakang ZAH-264 nga gimaneho ni Bobby Mark Julve nga taga Mahogany St . , sa barangay Lawaan 3 sa dakbayan sa Talisay.
Matud ni Deligero nga paingon ang multicab sa Mandaue apan pag-abot sa maong lugar kalit lang nibangga sa tuong bahin sa multicab ang maong awto nga gikan usab sa J. Luna nga paingon sa uptown area.
Gidugang ni Deligero nga tungod sa kakusog sa pagbangga nangalabay ang mga biktima ug nakaangkon og mga samad ug pangos sa ilang kalawasan ug gidala sa tambalanan.Padayon pang giimbestigar ang maong kaso. (BANATNEWS)