Nakaeskapong killer nadakpan

CEBU, Philippines - Nasikop pagbalik sa Provincial Intelligence Branch (PIB) niadtong Sabado sa gabii diha sa barangay Luray I, dakbayan sa Toledo ang suspetsadong tulisan kinsa nakaikyas gikan sa mga polis niadtong Biyernes sa hapon.

Si Levi James Villanueva kinsa maoy suspetsado sa pagtulis ug pagpatay sa negosyanteng nga si Ma. Belen Santillan niadtong milabay’ng buwan nasikop ubos sa tabang sa kapolisan sa Toledo ug sa mga ginikanan niini alas 11:00 sa gabii sa nahisgutang adlaw.

Apan bisan pa og nasikop pagbalik si Villanueva, si PO3 Cielo Quimat ug PO2 Jonathan Buscato dili gihapon makalingkawas sa imbestigasyon kinsa maoy nagbantay kaniya sa paghapit unta sa City Health Office alang sa medical check up una pa kini ilahos sa Toledo City Jail.

Ang suspetsado milayat gikan sa patrol car dihang mobalik na unta sila ngadto sa Toledo City Jail.

Si Supt. Rodolfo Albotra, hepe sa PIB nagkanayon nga ilang sutaon ang kalapasan sa maong mga polis nga hinungdan nga nakaeskapo si Villanueva.

Gikataho nga si Villanueva dunay posas sa iyang mga kamot dihang miikyas kini. Ang nahisgutang mga polis ang nangayo dayon og panabang sa PIB ug sa kapolisan sa Toledo nga gipangulohan ni Supt. Julian Entoma. Gawas niini nangayo usab sila og tabang sa pamilya sa suspetsado sa barangay Luray I. Ang kapolisan mipahigayon dayon og manhunt operation batok kang Villanueva.

Kahinumduman nga si Villanueva maoy suspetsado sa pagtulis ug pagpatay sa 59-anyos nga si Santillan, diha sa Barangay Don Andres Soriano sa milabay’ng buwan.

Si Santillan giingong paingong mopauli niadtong higayona ug nagdala kini og pay to cash nga tseke nga nagkantidad og P100,000.

Ang kapolisan mibutyag usab nga si Villanueva giingong sakop sa Fernando Sigue Group nga grupo sa mga tulisan nga nag-operate sa Balamban, Toledo City ug Naga City. Giingong ang kasagarang target sa maong grupo ang mga gasoline stations, lending collectors ug delivery trucks.

Ang kapolisan padayong nangita sa 10 ka mga personalidad lakip na sa mga bag-ong recruit sa grupo.

Si Villanueva ang gikatakdang ibalhin ngadto sa TCJ gikan sa Toledo Police Station detention cell diin niadtong Biyernes sa wala pa makaikyas ang suspetsado ang kapolisan nakadawat na og commitment order gikan sa korte sa pagbalhin kaniya ngadto sa TCJ.   - BANAT NEWS