P100 mil isdang binuthan sakmit

CEBU, Philippines -  Mikabat sa 45 ka kahon sa pinabuthang isda nga nagkantidad og kapin sa P100 mil ang nasakmit sa Team Eskina sa Cebu Provincial Anti-illegal Fishing Task Force didto sa Pasil Fish Market , ning dakbayan sa Sugbo sa miaging adlaw.

Si Oscar Barcenas, ang team coordinator sa Team Eskina sa Cebu Provincial Anti-illegal fishing task force nagkanayon nga ang maong mga isda gipailawom sa mga isdang dili pinabuthan. 

Matud pa ni Barcenas   nga migamit sila karon sa bag-ong   taktika sa pagsusi sa mga isdang pinabuthan aron mailhan nga may mga isdang pinabuthan nga gipailadman sa mga isda nga nakuha sa tinarong nga paagi nga ihandos sa mga negosyante sa kamerkadohan dinhi sa siyudad.

Ang nasakmit nga mga isda naglakip sa   solid, utdan, kihok,mulmol, lan-uhan ug uban pa nga gisagol sa kapin sa 300 ka kahon sa isda nga luwan sa 6 wheeler van nga may plaka nga GXR-990.

Gipugngan ni Barcenas ang ngalan sa negosyante nga maoy misuway og palusot sa maong mga isda.

Si Barcenas mipasidaan sa mga mananagat nga nagpadayon gihapon sa illegal nilang panagat o kaha namatigayon og isdang pinabuthan nga hunongon na nila ang maong bisyo aron dili mapuo ang ilang puhonan.

Kini tungod kay gihingusgan na pag-ayo karon sa kagamhanan ang paggukod niining maong matang sa patigayon.

Iyang gitataw nga ilang pasakaan og tukmang sumbong ang tag-iya sa maong mga isda lakip na ang tag-iya sa van nga maoy gikargahan niini.

Sama sa naandan ang maong mga isda gipanghatag sa Kapitolyo ngadto sa Boystown ug Girlstown ingon man sa Parian Drop-In Center sa sakbayan sa Sugbo. (BANATNEWS)