Nasunogan di pa patukoro'g balay kung way re-blocking

CEBU, Philippines - Gimando ni Mayor Michael Rama nga kinahanglang mohimo og re-blocking sa lugar nga nasunogan sa barangay Suba ning dakbayan niadtong Biyernes aron di na masubli pa ang kalisod sa mga bombero pagtubag sa alarma.

Nagkanayon si Rama nga kinahanglang padak-an gyud ang karsada sa maong dapit pinaagi sa pagbalik sa 3-meter easement dalan susama sa gibuhat sa ubang barangay nga gipadak-an ang karsada sama sa Tejero, Carreta ug uban pa.

Ang mayor mimando na usab ngadto sa kabomberohan sa siyudad nga gipangulohan ni Sr. Supt. Aderson Comar nga mohimo og nagkadaiya nga mga seminar o lectures ngadto sa mga sitio sa kabarangayan ilabi na nga gisaulog karon ang Fire Prevention Month.

“Kinahanglan gyud na kaayo nga duolon nila (BFP) ang mga tawo sa sitio, aron sila makahibalo kung unsa man ang ilang unang mga buhaton kung moigo ang sunog sa ilang lugar,” matud pa sa mayor.

Ang siyudad mohimo usab og clearing operation ug tangtangon ang mga barong-barong daplin sa dalan sa nahisgutang dapit.

Kahinumduman nga mokabat sa P1.1 milyones ang gibana-banang danyos sa sunog nga miugdaw og 93 ka balay sa sitio Tagutongan, sa barangay Suba ning dakbayan sa Sugbo niadtong Biyernes sa buntag ug tulo ang nangaangol.

Ang maong sunog gipaubos sa kabomberohan og general alarm hinungdan nga dunay mga kabomberohan sa ubang dapit nga mitabang.

Ang city department for social welfare and services (DSWS) mipadala na og mga relief goods sa mga biktima, gikatakdang mapadayon ang pagpakaon kanila sa siyudad sulod sa tulo ka adlaw.

Sumala pa sa DSWS 493 ka pamilya (2,093 ka tawo) ang nasunogan nga kasamtangang gipahiluna sa Pasil Fish Port ug sports complex ug gipadad-an na sila og mga medical personnel aron moatiman sa ilang panglawas.

Nagpadayon pa ang imbestigasyon sa kabomberuhan sa maong hitabo. (BANATNEWS)