'Suspek" pagtulis ug pagpatay nadakpan

CEBU, Philippines - Usa sa mga gidudahang suspek sa pagtulis ug pagpatay sa negosyanteng babaye sa dakbayan sa Toledo nadakpan sa gihimong nagsunod nga operasyon sa Provincial Intelligence Branch (PIB) diha sa lungsod sa Pinamungahan, Balamban ug dakbayan sa Toledo niadtong Sabado.

Si Levi James Villanueva, 19, taga barangay Tajao, Pinamungahan apan lumad nga taga dakbayan sa Toledo nasikop sa gipahigayong buy-bust operation niadtong Sabado sa mga alas 6:00 sa gabii diha duol sa iyang balay.

Si PO2 Cielo Quimat sa PIB mibutyag nga dihang gitunol ni Villanueva ang shabu ngadto sa poseur buyer ug gidawat sa suspetsado ang marked money nga P300 gisikop dayon nila kini.

Dihang ilang gikapkapan si Villanueva nakuhaan kini og pipila ka mga paketeng shabu ug ang kalibre .38 revolver nga dunay lima ka mga buhing bala. Matud ni Quimat nga si Villanueva giingong sakop sa grupo sa mga tulisan diha sa Toledo ug usa ka bulan na nila kining gipanid-an human sa nagsunod nga insidente sa pagpanulis uban sa pagpatay sa Toledo.

Si Villanueva giingong positibong giila sa usa sa mga saksi sa nahitabong tulis ug pagpatay sa usa ka negosyanteng si Maria Belen Santillan, 59, kinsa tag-iya sa Santillan Enterprises nga nahimutang sa sitio DasCC, barangay Don Andres Soriano niadtong Miyerkules.

Mga alas 10:00 sa gabii ang operatiba nakadawat og alarma kabahin sa usa ka armadong tawo diha sa barangay Poblacion, Toledo diin ilang nasikop si Nilo Gako, 40-anyos.

Nakuha gikan ni Gako ang usa ka dakong pakete sa shabu nga mokantidad og P35 mil ug usa ka kalibre .45 nga pistola nga dunay pito ka mga buhing bala.

Ang duha ka mga nasikop sa PIB nagtingkagol diha sa Consolacion Police Station detention cell ug gikatakdang pasakaan og kasong illegal possession of firearms ug kalapasan sa Dangerous Drugs Act Law.

Sa laing bahin, usa ka giingong notadong drug pusher ang nasikop sa gipahigayong pagpangronda sa kapolisan sa lungsod sa Balamban diha sa barangay Prenza mga alas 8:50 sa gabii sa nahisgutang adlaw.

Ang nasikop mao si Ronnie Canseco, 34, ug giingong level 2 drug pusher diha sa ilang lugar.

Naimbargo sa mga polis gikan sa position ni Canseco ang tulo ka medium nga pakete ug usa ka gamay’ng paketeng shabu.

Gawas niini naimbargo usab gikan sa iyang posisyon ang usa ka kalibre .357 nga revolver nga dunay unom ka buhing mga bala.

Si Canseco ang nagtingkagol sa karsel sa Balamban Police Station ug mag-atubang og kasong illegal possession of firearm ug kalapasan sa Dangerous Drugs Act Law. - Brenda D. Batuto, Darrel Carumba, Lesley Caminade ug Ria Mae Y. Booc sa The Freeman/EIM (BANAT NEWS)