BFP mo-inspection sa kabalayan

CEBU, Philippines - Ang kabomberohan sa dakbayan sa Lapulapu mo-inspection sa mga kabalayan sa maong siyudad ning ilang pagsaulog sa "Fire Prevention Month".

Kini maoy gipahayag ni Lapulapu City District Fire Marshal F/Supt. Victor Vibares sa pakighinabi sa Banat News kagahapon sa buntag.

Matud pa ni Fire Supt. Vibares nga sa Marso 5, sugdan na nila ang pag-inspection sa matag balay ilabi na sa mga lugar nga nagsikit-sikit   ang panimalay.

Ilang susihon kung wala ba kini illegal tapping sa kuryente nga maoy kasagarang hinungdan sa sunog.

Sa samang higayon molusad usab sila og mga seminar ngadto sa mga molupyo sa matag barangay aron tudloan sila bahin sa paglikay sa sunog.

Kagahapon sa buntag pormal nga gilusad sa kabomberohan ang "Fire Prevention Month " pinaagi sa usa ka santos nga misa ug gisundan sa motorkada sa mga kadalanan sa dakbayan sa Lapulapu isip pahimangno sa katawhan nga likayan gyud   ang sunog sa tanang higayon.

Samtang makig-alayon usab ang BFP ngadto sa kapolisan sa Lapulapu kung adunay sunog aron malikayan ang dagkong kadaot niini. (BANATNEWS)