CEBU, Philippines - Usa ka magtutudlo ang mopahigayon og long distance run gikan sa Consolacion ngadto sa dakbayan sa Talisay karong adlawa, Marso 1, 2012 alang sa Teacher’s Salary Upgrading.
Si Melina Twinkle Ignacio, kinsa usa ka Master Teacher nga nag-handle og MAPEH sa Don Vicente Rama Memorial High School modagan nga mag-inusara nga may kalambigitan sa ilang kampanya bahin sa gipangayo nilang Salary Upgrading sa tanang magtutudlo.
Ang Salary Upgrading gibase sa House Bill 2142 nga giduso ni ACT Partylist Representative Antonio Tinio ug sa Senate Bill 3008.
Ang maong duha ka balaodnon nagbuot nga ang starting pay sa tanang magtutudlo sa Department of Education (DepEd) usbawan gikan sa P17,000 ngadto sa P25,000 o gikan sa salary grade 11 ngadto sa salary grade 15.
Ang maong pagdagan ni Ignacio magpahimangno usab kini sa ubos balay balaoranan ug sa Senado sa pagtuki sa nahisgutang duha ka bill una sila mobakasyon sa Marso 24 ngadto sa Mayo 6, 2012.
Giawhag usab niini ang Department of Budget and Management (DBM) sa pagsubmitir sa long-overdue position paper sa duha ka nahisgutang mga bill nga gipangayo sa mga magbabalaod sa nasud.
Ang mga magtutudlo sa Consolacion mosaksi kang Ignacio didto sa starting line atubangan sa Consolacion Central School sa alas 6:00 sa buntag.
Ang iyang daganon may gilay-ong 30 ka kilometro nga moagi sa DepEd Mandaue City ug Cebu City School Division Office ug matapos sa DepEd Talisay City Division sulod sa unom ka oras.
Karong alas 12:00 sa udto si Ignacio gibana-banang maabot na sa DepEd Talisay Division. Si Ignacio usa ka marathoner sa panahon sa iyang pagka-estudyante ug nakadagan na kini sa 104 km run gikan sa dakbayan sa Bogo ngadto sa dakbayan sa Sugbo sulod sa 15 ka oras ug nahimo siyang ika-upat nga finisher sa mga babayeng runner sa maong higayon. - BANAT NEWS