Banggiitang mga opisyal gipasidunggan

CEBU, Philippines - Ang kagamhanan sa lalawigan sa Sugbo mihatag og pasidungog sa mga tawo nga nakatampo sa pagpalambo sa pinulongang Sugbuanon.

Ang maong pasidungong gihimo atol sa gipahigayong panagtigum sa kalihukang Sugbuanon nga nagdala sa temang, " “Kalihukang Sugboanon sa Kabaghoan” nga gipangulohan ni Provincial Board member Arleigh Sitoy sa sixto distrito didto sa Capitol Social Hall niadtong Biyernes.

Ang maong tigum   gipunting sa pagbanhaw sa pinulongang Sugbuanon ug sa pagpalambo sa arte, kultura ug uban pang mga simbulong Sugboanon nga maoy usa sa gihingusgang programa ni Governor Gwendolyn Garcia.

Gitambongan usab kini nila ni Cordova Mayor Adelino Sitoy ug Consolacion Mayor Teresa “Nene” Alegado uban ang mga opisyal sa barangay ug mga opisyal sa sixto distrito.

Ang nakadawat og pasidungog nga gisaludohan sa mga opisyal sa kagamhanan sa lalawigan mao sila si Mayor Adelino Sitoy sa lungsod sa Cordova tungod sa iyang Diksyonaryong Bisaya; Manuel Faelnar sa iyang MTB MLE; Greg Jumao-as sa iyang Akademyang Bisaya; Tudela ABC President ug konsehal Greman Jojo Solante sa paggamit nila sa pinulongang Sugboanon atol   sa ilang sesyon, Flor Ballesteros sa kasaysayan ug kasinatian sa pagkuha og mga balita ug si Capitol Consultant on Heritage affair and Museo Sugbo Prof. Jose Eleazar Bersales .

Tungod sa maong kalihokan gidayeg nila ni Mayor Sitoy ug Mayor Alegado ang kagamhanan sa lalawigan sa Sugbo sa pagpanguna ni Gobernador Garcia gumikan sa paghatag niini og dakong importansya sa pinulongang Sugboanon.  - BANAT NEWS