Mag-uuma gipusil angol sa silingan

CEBU, Philippines - Kritikal ang kahimtang sa usa ka mag-uuma human kini pusila sa iyang silingan kinsa nasuko nga gikaon sa iyang baka     ang   mga tanom nga mais sa suspetsado didto sa barangay Cahumayan, dakbayan sa Danao sa miaging gabii. Ang biktima mao si Henerito Tolo, 38, samtang   ang suspetsado mao si Ananias Calderon, hingkod nga pulos nagpuyo sa Cahumayan.

Si SPO2 Ildefonso Prosia sa kapolisan sa maong dakbayan nga nahinabi sa Banat News miingon nga nasuko ang suspetsado kay gikaon sa baka sa biktima ang iyang mga mais nga tinanom. Nagtuo ang kapolisan nga wala tuyoa sa biktima nga   ipasabsab sa iyang baka ang mga tinanom nga mais sa suspestado.

Apan matud pa ni SPO2 Prosia nga wala na makapaabot ang suspetsado sa eksplinasyon sa biktima.

Dihang gikuha sa naulahi ang iyang baka gikan sa kamaisan sa suspetsado, gisugat siya sa naulahi ug gipusil sa makadaghang higayon pinaagi sa wala pa matinong kalibre sa armas niini. Ang biktima nga samdan sa dughan, paa, bukton ug uban pang bahin sa iyang lawas dali nga gihatod ngadto sa Danao District Hospital apan gibalhin usab dayon kini ngadto sa Vicente Sotto Memorial Medical Center sa dakbayan sa Sugbo.

Si SPO2 Prosia miingon nga ang suspetsado nga andam motubag sa iyang sala nasikop usab dayon sa mga otoridad ug karon napaslak na sa prisohan sa Danao samtang gipasakaan na og tukmang  kiha sa mga kabanay sa biktima. (BANATNEWS)