CEBU, Philippines - Gipadayag ni Chief Insp. Romeo Santander, hepe sa Criminal Intelligence Branch (CIB) sa Cebu City Police Office (CCPO) nga malipay ang kapolisan sa gisaad ni Mayor Michael Rama nga dugangan og laing P1,000 ang ilang allowance matag buwan.
Ang maong saad giluwat sa mayor human masikop sa kapolisan ang mga suspetsado sa drive -by shooting, mipusil patay sa duha ka police asset ug ang duha ka tulisan nga misuway og tulis sa duha ka langyaw.
Matud sa mayor nga iya kining ipaapil sa supplemental budget sa dakbayan kay nakita sa mayor ang ilang paningkamot.
Nagtuo si Santander nga pinaagi niining dugang allowance nga gisaad sa mayor labi pang mokugi ang kapolisan sa ilang trabaho.
Apan gipasalig ni Santander, nga may dugang man nga allowance o wala, tumanon nila ang ilang trabaho sa pagpanalipod sa publiko gikan sa mga kriminal ug sa paggukod sa mga kriminal nga naghatag og kasahol sa publiko.
Gihangop usab ni Santander ang plano sa mayor nga hatagan sila og dugang mga motorsiklo nga dali ug gaan kaayo nilang magamit sa pagtubag sa mga alarma.
Matud ni Santander nga kun aduna man gani idugang nga motorsiklo, ila kining ihatag ngadto sa 11 ka police station nga pasakyan sa mga polis nga sakop sa Miscellaneous team.
Nanghinaot si Santander nga magpadayon ang kooperasyon sa publiko ngadto sa kapolisan kay dili sila magmalampuson sa ilang kampanya batok sa tanang klase sa kriminalidad kun kuwang og abag ang katawhan. (BANAT NEWS)