CEBU, Philippines - Sakyanan ni Bokal Peter John Calderon gidaro sa dump truck kagahapon sa buntag diha sa Cebu South Coastal Road habig sa sitio Salvador, barangay Tanke, dakbayan sa Talisay hinuon walay dautang nahitabo sa bokal ug sa iyang drayber.
Nagusbat hinuon ang walang bahin sa Toyota Hilux nga kolor itom nga nagtangag sa plakang SHT-458 nga gisakyan ni Calderon kauban ang iyang drayber Maranito Labiste.
Si Calderon bisan sa nahitabo nagpakuha na lang kini og laing sakyanan ug mitambong gyud sa meeting ngadto sa Kapitolyo ug ang drayber nalang niini maoy miatubang sa media.
Matud pa ni Labiste, 39, gikan sila sa lungsod sa Samboan sa balay ni Calderon paingon sa Kapitolyo sa dakbayan sa Sugbu dihang usa ka dump truck nga gimaneho ni Jesus Ondoy, 48, paingon usab sa dakbayan sa Sugbo ang kalit nga mibangga sa likod nga bahin sa Hilux ug gidaro kini.
Si Ondoy nga nahinabi sa mga tigbalita nagkanayon nga gikan siya sa barangay Inayawan naghakot og basura paingon unta sa lungsod sa Consolacion apan giingong adunay usa ka 10-wheeler truck nga kalit lang miliko gikan sa atbang.
Matud niya nga naatlan usab nga naputol ang preno sa iyang truck maong gipasaka niya kini sa gutter apan ang Hilux nga nagsubay sa daplin naabtan gyud. (BANATNEWS)