Nominado sa Charter Day gihashasan

CEBU, Philippines - Gipahibalo ni Mayor Michael Rama nga dili siya pabor nga malakip ang pangalan ni Assistant City Treasurer Tessie Camarillo sa listahan sa mga nominado sa Most Outstanding Individuals isip parte sa kalihukan sa Charter Day sa Siyudad saSugbo.

Nagkanayon si Rama nga dili maayo paminawon nga taga City Hall ra usab ang matagaan sa maong pasidungog gumikan kay alang unta kini sa mga indibidwal nga wala nagtrabaho sa nahisgutang institusyon.

Matud pa ni Rama nga mosugot lang siya kung si Camarillo malakip sa listahan sa nominado alang sa most outstanding employee.

Dili usab pabor si Rama sa pagkabutang sa listahan sa Asian College of Technology (ACT) alang sa kategoryang outstanding institution.

Nagkanayon si Rama nga duna siya’y nahinabi nga pipila ka mga konsehal nga matud pa dili lang ang ACT maoy nagserbisyo sa mga scholars sa siyudad sanglit daghan pa nga mga unibersidad ang nagtanyag sa maong serbisyo.

Sa gipahigayong sesyon kagahapon, mi-abstain si Konsehal Joey Daluz ug Edu Rama sa resolusyon nga giduso ni Konsehal Margarita Osmeña kalabot sa mga pangalan sa nominado.

Sila si Daluz ug Rama misaysay nga ang ACT gipanag-iya ni Konsehal Rodrigo Bebot Abellanosa ug naglikay lang sila sa mga intriga apan si Osmeña midepensa nga ang listahan sa nominado gipaubos sa lapad nga delebirasyon sa mga sakop sa Cultural and Historical Affairs Commission (CHAC) busa patas ang pag-umol niini.

Nagkanayon si Osmeña nga ang pagka-nominate ni Camarillo ug sa ACT nagikan sa mga selection committee busa angayan kini nga respetohon.

Kahinumduman nga wala nagkasinabot kaniadto sila si Rama ug Camarillo sa dihang kini pa ang mibarog isip acting treasurer sa miaging tuig sa rason nga nawad-an siya og pagsalig niini gumikan kay maglisod kini og depensa sa giduso niya nga budget.  - BANAT NEWS