Mga batan-on girakrakan usa patay

CEBU, Philippines - Patay ang usa ka menor de edad human kini pusila sa wala pa mailhing tawong nagmotor didto sa Salvador Extension, barangay Labangon ning dakbayan, sa Sugbo kagahapon sa alas 5:00 pasado sa buntag.

Ang biktima nailhan nga si Joseph Reperior, 16, sitio Kalihon sa maong barangay.

Sa pasiunang imbestigasyon sa kapolisan nasayran nga ang biktima sa wala pa pusila mipasakay sa iyang hinigugma.

Human niini, uban sa iyang mga higala nagbaklay na ang grupo balik sa ilaha apan samtang nagtangas sila kalit lang mipatim-aw ang usa ka motosiklo ug ang angkas niini mipaulan og bala sa grupo.

Si Reperior naigo sa suwang ug gituohang milapos ang bala ngadto sa iyang ulo nga maoy hinungdan sa iyang hinanaling kamatayon.

Ang mga mamumuno daling mipasirit sa ilang motorsiklo palayo sa maong lugar samtang ang biktima wala na madala sa tambalanan.

Sa pakighinabi sa Banat News ni PO3 Geoffrey Gutual sa Cebu City Police Office Homicide Section, mibutyag nga base sa nakuha nilang impormasyon pinangulohan ni SPO1 Ruel Ayuman walay giapilan nga fraternity ang biktima.

Apan matud pa ni Gutual nga nakadungog si Ayuman gikan sa mga molupyo sa maong lugar nga ang biktima sa milabay’ng adlaw nakulatahan kini.

Nakita usab ni Ayuman nga adunay posibilidad nga sakop sa gang ang namusil apan ila pa kining sutaon.

Padayon pa karun ang imbestigasyon kalabot sa maong insidente ug kun unsay motibo sa pagpamusil. (BANATNEWS)