Kaso vs Banat News gibasura sa piskalya

CEBU, Philippines - Wala ikahimuot sa deputy member sa Cebu City Anti-Indecency Board (CCAIB) ug state prosecutor Aida Sanchez ang nakab-ot nga desisyon ni acting Cebu City Prosecutor Nelia Sistoso kalabot sa kasong gipasaka nila batok sa duha ka lokal nga tabloids sa dakbayan sa Sugbu.

Si Sistoso mirekomendar sa pagbasura sa kaso batok sa Banat News tungod sa sinuwat ni Cindy Jones nga “Handumanan sa Pista” tungod sa kakulang sa basehan, samtang duha ka kaso batok sa tabloid nga Superbalita ang gipasaka ngadto sa korte.

Ang duha ka tabloids gipasakaan og kaso sa CAIB tungod sa paglapas sa City Ordinance No. 1408 nga mao ang Anti-Indecency Ordinance ug Article 201 sa Presidential Decree 969.

Nasayran nga si Sistoso mirekomendar sa pagpasaka sa susamang kaso ngadto sa korte batok sa Superbalita kalabot sa “Kabit” nila nga isyu.

Ang abogado sa Superbalita nga si Atty. Angelo Forñales dihang gikuhaan og pamahayag sa Banat News mibutyag nga iyaha pang gitun-an ang resolusyon ni Sistoso.

Apan kini mipadayag nga posibleng mosang-at sila og motion for reconsideration tungod kay adunay napulo ka adlaw nga gihatag kanila sa paghimo niini. (BANATNEWS)