Kabanay sa mga biktima nahadlok

CEBU, Philippines - Ang bana sa naapil sa ambush nga caretaker sa pamilyang Sesbreño niadtong Miyerkules nabalaka sa iyang seguridad human gikatahong giduol og mga lalaki nga nag-awhag kaniyang magpakahilom nalang sa gidangatan sa iyang asawa.

Si Magdaleno Epanto, 52, residente sa sitio Pungsod, Lawaan III, Talisay, bana sa napatay nga si Soledad Epanto midangop sa Talisay police aron pagsumbong sa gibuhat sa iyang silingan kaniya.

Si SPO1 Isaias Cabuenas, duty desk officer sa TCPS mibutyag sa Banat News nga ang miduol kang Magdaleno iyaha rang mga silingan apan dihang iyang gipangutana wala niya hinganli ang maong mga silingan.

Kahinumduman nga si Soledad uban sa asawa ni Atty. Raul Sesbreño nga si Virginia Sesbreño ug ni Joshua Young sakay sa Isuzu DMax pick up nga sakyanan nga gibanhigan sa duha ka wala mailhing mga lalaking nagmotorsiklo nga pulos nangamatay.

Gawas kang Magdaleno, si Amelia Villaver, hingkod ang panuigon, residente diha sa Lawaan II, sinaligan usab sa pamilyang Sesbreño uban sa iyang anak nga si Pamela Villaver, 22, ang nagpa-rescue sa kapolisan kagahapon sa hapon. Si SPO1 Mikie Espina kinsa usa sa mga mi-rescue sa duha mibutyag sa Banat News nga nakabati og estoryang adunay mga armadong lalaking nagmotorsiklo nga nangita kang Amelia kay apilon kini sa pagpatay.

Si Amelia mokuyog unta sa maong sakyanan nianang pagkahitabo apan si Virginia maoy gidala sa ilang agalon.

Tungod sa maong mga balita hasta silang mga katabang sa pamilyang Sesbreño nahadlok na sa ilang kinabuhi ug dili na makakaon og tarong, ang duha anaa karon sa kostudiya sa kapolisan. Sa laing bahin, si Supt. Eddie Recamara, hepe sa TCPS nagkanayon nga ang drayber sa motorsiklo nagputong ug nagsul-ob og sunglasses aron matago ang iyang nawong samtang ang angkas nga gunman wala magtabon sa nawong.

Ang maong drayber taga Talisay samtang ang gunman dili taga dakbayan sa Talisay ug giingong usa ka gun for hire ug sulod gawas kini sa prisohan.

Gibutyag sa hepe nga duna silay upat ka mga “eye witnesses” nga maoy makatumbok sa mga suspetsado ug gisusi na usab nila ang pasangil ni Atty. Sesbreño ngadto sa unom ka mga tawo nga maoy utok sa pagpamanhig.

Ang maong unom ka mga tawo giingong nakabangi ni Sesbreño tungod sa pagbabag nila sa demolisyon ug sila gipatawag na sa ilang presinto apan dili pa maisip nga sila mga suspek hangtud nga walay ebidensya.

“101 percent I will continue the demolition even if it would risk the lives of my family,” maoy gipamulong ni Atty. Raul Sesbreño ang bana sa nakalas nga si anhing Virginia.

Matud pa niini nga wala kini makapatalaw kaniya aron hunongon ang demolisyon sa Barangay Lawaan 1, 2 ug 3 ug kini maoy iyang paagi sa panimalos.

“I still have 5 years to do it (demolition) so even next year or a year from now I can still have their houses demolished bisan pila pa sa akong pamilya ang kuhaon nila,” matud pa niini.

Subli niyang gipahibalong nailhan na niya ang mastermind ug midangop na siya sa National Bureau of Investigation bahin niini, nagtuo usab siyang adunay mga adunahang naapektahan sa demolisyon ang kakunsabo sa planong pag-ambush.

“Duda ko dunay laing nagpaluyo nga kuwartahan nga apil sa demolition nga gusto pud patyon akong asawa aron ihunong ang demolition,” matud pa niya. (EIM) - (BANAT NEWS)