Nanambling gipusil patay

CEBU, Philippines - Patay diha- diha ang 42 anyos nga ulitawo nga gipusil sa wala hiilhing criminal nga nagsakay og motorsiklo   didto sa Olivar St., barangay Poblacion, siyudad sa Danao niadtong Lunes sa alas 4:30 sa hapon.

Ang biktima mao si Godofredo Villaester, 42, ulitawo, way trabaho, nga taga highway Looc, dakbayan sa Danao. Si SPO2 Ildefonso Prosia, Desk Officer sa Danao City Police Station mibutyag sa Banat News nga ang biktima nagbarug -barog sa highway sa maong lugar dihang kalit lang mihunong ang usa ka motorsiklo nga gisakyan sa duha ka tawo.

Nanaog ang angkas niini ug maoy mipusil sa makadaghang higayon sa biktima.

Ang mga samad sa ulo ug dughan ug uban pang bahin sa lawas maoy gituohang nakamatay dayon sa biktima.

Human mahagba sa karsada gibiyaan kini sa mga kriminal kinsa mipasirit dayon sa ilang sakyanan pahilayo sa maong dapit.

Napunitan sa kapolisan sa lugar diin patya ang biktima ang upat ka mga kabhang sa 9mm pistol ug mga drug paraphernalia sama sa disposable lighter ug tin foil nga diha sa patay’ng lawas sa biktima.

Matud ni SPO2 Prosia nga nasayran nila   nga ang biktima wala mobayad sa gikompra niining gidiling drugas gikan sa negosyante niini nga maoy gituohan nga kini gipusil patay.

Hinuon ang kapulisan padayon pa sa ilang imbistigasiyon sa maong hitabo. (BANAT NEWS)