CEBU, Philippines - Temporaryong gipahunong ang pagkubkob sa yuta sa daplin sa dagat sa South Road Properties (SRP) samtang gianinaw pa kun wala na bay laing mga karaang bomba nga gipanglubong sa maong lugar.
Kini ang gibutyag kagahapon ni Philip Zafra, executive assistant ni Mayor Michael Rama human makawti ang 23 ka mga vintage bomb sa maong dapit nga nahisakop sa Kawit Island kaniadto.
Ang lugar diin makawti ang maong mga bomba gibantayan na kagahapon sa mga sakop sa Special Weapons and Tactics (SWAT) aron pagsiguro sa seguridad sa maong dapit.
Sa pagsuwat niining balita, gipatawag na usab kagahapon ang mga sakop sa Central Command alang sa pagpahungaw sa maong mga bomba nga dili na makabuto.
Samtang gibutyag ni Zafra nga padayon pang gisusi karon ang mga impormasyon kun unsay anaa sa maong mga bomba nga nakalanat man kini og pila na ka tuig sukad niadtong ika-duhang gubat sa tibook kalibotan.
Ang dapit diin hikawti ang maong mga bomba gikubkob sa mga trabahante sa konstruksyon sa kagamhanan sa dakbayan alang sa beautification project sa SRP .
Apan ang usa ka drayber sa backhoe nakurat nalang dihang pagdugsak sa suwab sa iyang backhoe nga para habwa sa yuta mikagilgil sa kagahi ang mga puthaw nga naigo niini.
Sa dihang gisusi sa iyang mga kauban, nasuta nga mga karaang bomba nga gipanglubong sa maong lugar.
Nagpasalamat nalang ang mga trabahante nga wala makabuto ang maong mga bomba nga gituohang dili gamay nga kadaot sa palibot kun namuto pa kini.
Ang nahisgutang lugar wala na paduoli og mga tawo karon subay sa mando ni Alvin Santillana sa Cebu City Risk Reduction Management Council (CCRMC) .
Nasayran usab gikan kang Lt. Col. Christopher Tampus, tigpamaba sa AFP Central Command kinsa maoy nangulo sa pagsusi karon sa maong mga bomba nga matag usa ka bomba may gibug-aton nga tag 150 ka libra o sama sa gibug-aton sa usa ka tawo.
Matud pa niya nga puwede pa kining mobuto hinungdan nga nakig-alayon sila karon sa taga City Hall aron ika-schedule ang pagpahungaw niini.
Midugang siya nga ang maong mga bomba nga gitawag nga general purpose bomb may ‘picric acid” nga kun masaghiran sa tawo, mangatol ang kalawasan niini. - Uban sa report ni Rey Pasaporte/WC (BANAT NEWS)