Parokyano sa Minglanilla gusto'g diyalogo kang Palma

CEBU, Philippines - Subling gipanawagan sa mga parokyano sa Immaculate Heart of Mary Shrine nga papahawaon lang una ang ilang pari samtang init pa ang isyu kabahin sa ilang reklamo batok niini nga may kalambigitan sa imoralidad.

Kahinumduman nga duha sa mga pari sa nahisgutang simbahan ang gipasanginlang nangmolestiya og mga batan-on ug usa sa maong pari ang gipabalhin na ngadto sa laing lugar.

Si Raulito Plarisan, 39-anyos, taga Ward III, Poblacion, Minglanilla ug katekista sa simbahan mipasabot sa mga tigbalita nga usa ka diyalogo ang ilang gihimo diin ang mga layman nanawagan sa kalinaw ug kahiusahan sa parokya.

Kagahapon ang mga lay minister, sakristan ug ubang mga parokyano uban sa mga giingong mga biktima ang mitambong sa diyalogo. Matud ni Plarisan nga ang maong isyung migawas ang kabahin sa pagka-pari ug angayang depensahan ang tinuohan isip Katoliko aron dili mabiay-biay ngadto sa ubang mga tinuohan o relihiyon.

Matud niya nga ang iyang mga ginikanan dili Katoliko ug tungod sa maong isyu batok sa mga pari gibiay-biay siya sa iyang mga ginikanan apan bisan pa niini gibarogan niya ang iyang pagka-Katoliko.

Gihangyo sa mga lay minister nga kinahanglang adunay mahitabong diyalogo tali sa kaparian sa parokya diha atubangan ni Arsobispo Jose Palma aron mahusay na ang parokya ug mahilom na ang isyu.

Si Plarisan nangangkon nga siya maoy unang gisumbongan sa mga bata nga giingong nabiktima apan nahibulong sila nga ang maong isyu migawas ngadto sa media ug pipila niini dili tinuod.

Iyang gibutyag nga miadto siya kang Bishop Palma ug nagpahibawo sa maong hitabo ug gitagad siya sa Arsobispo sa maong problema.

Si Plarisan miangkong tungod sa maong isyu walay maayong relasyon ang kaparian ug mga parokyano sa ilang lugar ug maayong tangtangon lang una ang mga pari aron malinaw na ug mahilom na usab ang mga estorya.

Hinuon giklaro niining kung ma-reporma na ang maong mga pari mahimo ra nila kining dawaton og balik diha sa ilang lugar.

Sa laing bahin, usa sa mga labaw sa maong simbahan nga nahinabi sa mga tigbalita nagkanayon nga dili buot magpahingalan mihulagway nga “old issue” na ang hitabo ug ang nahitabo karon wala nay pagtahod sa kaparian tungod sa pagbalikbalik.

“May we learn this things happened to become church God’s wants to be…..,To this experienced may the people, may the Christian learn to become church God’s wants to be,” sumala pa sa maong opisyal. Gawas sa unang isyu gilakbit usab niini ang pagpasabot kabahin sa pagpatanto og kwarta sa simbahan nga gihimong daganan sa mga nanginahanglang parokyano.       

Iyang gipasabot nga dunay duha ka parokyano ang mihatag og tabang ug mihatag og P1 milyon nga maoy nahimong puhunan sa maong proyekto sa simbahan nga mao ang “Kabuhian.”

Giingon nga ang makahuwam og kwarta diha sa simbahan mohatag og dos porsyento nga tubo sa kwarta nga ilang gihuwaman.

Apan gipasabot sa nahisgutang opisyal nga dili matawag nga tubo ang gihatag nga dos porsiyento tungod kay gidugang kini ug maisip nga dugang tabang usab kini nila ngadto sa uban nga manghulam. (BANATNEWS)