CEBU, Philippines - Napalgan sa kapolisan kagahapon sa buntag didto sa barangay Tabok, dakbayan sa Mandaue ang giabandonar nga taxi nga gi-carnap sa tulo ka wala hiilhing tulisan didto sa sitio Capasanan sa barangay Casili sa maong dakbayan niadtong Sabado sa gabii.
Ang Strawberry taxi nga nagdala sa plate number GXG 243 gimaneho ni Roel Villacorta, 38, nga taga barangay Talamban, dakbayan sa Sugbo.
Si PO2 Alvin Fegarido sa kapolisan sa Investigation Detection and Management Bureau (IDMB) sa Mandaue City Police Office (MCPO) miingon nga pipila ka molupyo sa maong dapit maoy nakasigpat sa maong taxi nga gi-parking sa daplin sa karsada.
Natingala ang mga residente kay wala silay drayber nga nakita hinungdan nga ila kining gitaho sa kapolisan sa Presinto 3 sa Basak Police Station.
Sa ilang pakisusi, ilang nasuta nga ang maong taxi maoy gi-carnap sa tulo ka tawong pasahero ni Villacorta human siya tulisa niini ug gisakiyo ang iyang kapin P1,000 nga kinitaan.
Sayo niini giasoy ni Villacorta nga ang tulo ka wala hiilhing tulisan kinsa nagpakaaron ingnong pasahero didto mosakay kang Villacorta sa dalan AS Fortuna sa barangay Banilad ug nagpahatod sa barangay Casili, sa dakbayan sa Mandaue.
Apan pag-abot nila sa awaaw nga bahin sa sitio Capasanan sa nahisgotang barangay gitionan og armas ang iyang tingkoy sa usa sa tulo ka mga pasahero dayong deklarar nga tulis.
Unya ang laing pasahero nga didto sa iyang tupad maoy mikuha sa iyang kapin P1,000 nga kinitaan sa pamasahero dayon gipakanaog siya sa taxi.
Sa pagkanaog niya, gipasirit dayon sa mga tulisan ang sakyanan busa wala siya’y laing nahimo gawas sa pagsumbong niini ngadto sa kapolisan.
Si PO2 Fegarido miingon nga padayon pa nilang gipanid-an aron mailhan ang mga tulisan.(/WC) (BANATNEWS)