CEBU, Philippines - Usa ka dakong opisyal sa Alpha Kappa Rho (Akrho) sa Minglanilla nga gipasanginlang level 2 drug pusher ang natiklo sa mga ahente sa Philippine Drug Enforcement Agency (PDEA) Central Visayas atol sa buybust operation sa miaging gabii sa pinuy-anan niini sa barangay Pakigne.
Si Jessie Tabanao, tigpamaba sa PDEA-7 miila sa suspetsado nga mao si Michael Gabi Gerasmio, 33, nagpuyo sa maong lugar kinsa duha ka semanang gipanid-an tungod sa report nga namaligya kini og nubain ug shabu.
Matud ni Tabanao ilahang napalitan si Gerasmio og usa ka paketeng gidudahang ang sulod shabu nga balor og P200 ug usa ka nubain ampule nga nagkantidad og P300 hinungdan nga kini nadakpan.
Laing nakuha kang Gerasmio ang 22 ka ampules nga nubain ug laing siyam ka paketeng gidudahang ang sulod shabu og P740 cash nga gituohang halin sa pagpamaligya niini og ginadiling drogas.
Sumala pa usab nga lakip sa gipamaligya ni Gerasmio ang gitawag nga ‘milkshake’ nga gisagol nga nubain ug shabu nga iturok sa adik ug giingong upat ka adlaw ang ‘tama’ niini apan gipahimangno sa PDEA nga makamatay kini.
Ang ubang ebidensya nga nakuha naglakip sa pito ka disposable syringes, usa ka test tube, unom ka tinfoils, usa ka rectangular plastic container ug usa ka Colt 1911 nga .45 nga kalibre sa armas may magazine ug unom ka buhing mga bala.
Ang suspek dihang gikuhaan sa iyang pamahayag sa mga tigbalita miangkon nga upat na ka bulan siyang namaligya’g nubain ug shabu ug wala siyay trabaho samtang masakiton usab ang iyang inahan hinungdan nga napugos siya pagnegosyo niini.
Kasong kalapasan sa Section 5,11 ug 12 sa Republic Act (R.A) 9165 ug laing kaso mao ang PD 1602 kon illegal possession of firearms and ammunitions ang ipasaka batok kang Gerasmio.(/EIM) (BANATNEWS)