Sr. Sto. Niño kaabag sa Katoliko

CEBU, Philippines - Ang Visayas Clergy Discernment Group (VCDG), usa ka hugpong sa mga kaparian ug Obispo sa Visayas nanawagan sa mga Katoliko nga magbag-o duyog sa kasaulogan sa kapistahan ni Señor Santo Niño.

Matud pa sa VCDG nga kinahanglang matag Katoliko mahimong kahimanan ni Santo Niño aron motubag sa suliran sa kakabus sa Pilipinas.

Si VCDG Head Convenor Obispo Gerardo Alminaza nagkanayon nga ang tema karong tuiga nga “Sto.Niño, Dalangpanan sa Kristohanong Banay nga Pilipino”, nag-agni sa mga Katoliko nga magtinabangay.

“Kinahanglan mangutana kita, unsaon man nga ang Sto.Niño mamahimong dalangpanan sa mga kabos nga banay kinsa nahikawan sa batakang serbisyo sosyal sama sa serbisyo sa panglawas, edukasyon, housing ug uban pa?” matud pa ni Alminaza.

Gawas pa niini, gipamata usab niini ang mga Katoliko nga si Sto. Niño isip maoy Dios dinhi sa Sugbo nga maoy mosulbad sa nagkagrabeng pag-atake sa moralidad sa pamilya pinaagi sa mga kahilayan sa internet ug media.

Alang sa VCDG ang ilang tema gibase sa mensahe ni Papa Benedicto XVI sa World Day of Prayer for Peace nga miingon nga ang pamilya mao ang unang tulunghaan nga mo-umol sa mga kabataan sa mga buluhaton alang sa hustisya ug kalinaw.

“Ang banay, isip sukaranan sa katilingban, adunay tahas sa pagbuhat alang sa usa ka tinuod nga kausaban sa katilingban, ug gikinahanglan mangalagad sa pagpanday sa gingharian sa Dios o Sto. Niño dinhi sa kalibotan,” matud pa sa VCDG.  - BANAT NEWS