Bise mayor misalbar sa pag-umangkon gikan sa tulisan

CEBU, Philippines - Bise mayor sa lungsod sa Carmen nga miresponde sa iyang pag-umangkong babaye nga gitulis diha sa atubangan sa ilang balay gitionan og armas sa duha ka mga tulisan diha sa barangay Poblacion Carmen niadtong Lunes sa alas 6:20 sa gabii.

Swerteng nadunggan ni Bise Mayor Silvestre Al Dameles ang singgit sa iyang pag-umangkong si Irish Cabahug Garcia, 31, kinsa nagpuyo sa tupad nilang balay dihang kini gitulis sa duha ka lalaking nag-angkasay sa usa ka motorsiklo nga way plate number.

Matud ni PO2 Jesrhel Into, desk officer sa Carmen Police dihang nahinabi sa Banat News mao pay pag-abot ni Garcia sa ilang ganghaan human manaog sa traysikol dihang gibabagan og motorsiklo sa mga tulisan nga gituohang diha nang daan sa maong lugar nagpaabot.

Ang usa daling miduol ug mition sa biktima og armas dayong deklarar nga tulis apan abtik nga naitsa ni Garcia ang iyang bag sud sa gate sa balay sa iyang uyoan nga bise mayor dungan sa pagsinggit pagpangayo og tabang.

Si Bise Mayor Dameles kinsa nakadungog sa singgit sa pag-umangkon daling migawas ug naabtan ang duha ka tulisang padayong nagtion og armas kang Garcia ug pagkakita kaniya siya na usab maoy gitionan. Wala magdugay daling miikyas ang duha palayo sa maong lugar samtang gibiyaan nga nakugang si Dameles ug Garcia.

Ang kapulisan nagdudang mga molupyo ra sa maong lungsod ang maong mga tulisan tungod kay nakaila man sila sa bise mayor. (BANAT NEWS)