Arroyo nabalhin na sa VMMC Gikan sa wires

CEBU, Philippines -  Pormal nang gibalhin sa Veterans Memorial Medical Center (VMMC) ang kanhi presidente ug karun kongresista Gloria Macapagal Arroyo kagahapon sa hapon pasado alas- 3 sa syudad sa Quezon.

Si Arroyo gikan sa St. Luke's Medical Center (SLMC) sa syudad sa Taguig gibalhin aron ipatuman ang hospital arrest.

Sa report sa GMANews.TV, gisakay si Arroyo sa usa ka coaster van diin convoy niini ang pito ka sakyanan.

Ang Pasay City court mimando sa pagbalhin ni Arroyo sa nahisgutang tambalanan sa miagi pang semana tungod sa kasong electoral sabotage sa miaging 2007 elections.

Ang kampo ni Arroyo mikwestyon sa maong kamandoan tungod kay wala sila gikonsulta sa pagbalhin sa kanhi presidente.

Kahinumduman nga ang Commission on Elections (Comelec) mipasaka og kasong electoral sabotage batok kang Arroyo niadtong November 18 diha sa Pasay City court.

Samtang ang mga supporters usab ni Arroyo nagtapok sa SLMC ug VMMC sayo pa kagahapon sa buntag nga nagbitbit og mga placards nga nagpadayag sa ilang pasalamat sa natabang kanila ni Arroyo ug pagpadayag usab sa ilang suporta sa kanhi pangulo sa nasud.

Ang mga suporters naggikan sa Manila ug syudad sa Quezon ug sa probinsya ni Arroyo ang Pampanga hinungdan nga gipahugtan ang seguridad sa palibot sa maong duha ka tambalanan. (BANATNEWS)