Mandaue officials gireklamo sa Philcadan Residents

CEBU, Philippines - Pormal nang gipasaka sa mga residente sa Mahiga Creek sa siyudad sa Mandaue ang kasong Preliminary Injunction ug Temporary Restraining Order (TRO) batok ni Mayor Jonas Cortes sa siyudad sa Mandaue aron pugngan sa korte ang mayor ug kagamhanan sa Mandaue sa pagpa-demolis kanila.

Lakip sa gipasakaan og reklamo mao si Atty. Francisco Amit Jr. nga maoy city consultant to the mayor on housing, Emmanuel Arong ang chairperson sa Housing and Urban Development Office ug Dennis Lua nga maoy gitumbok nga tag-iya sa luna sa 6.5 ka ektaryang luna nga gisanapan sa tubig dagat nga relocation site.

Sumala sa kihante nga sila si Roberto Litaba, Josefina Caya, Jose Larsan ug Milagros Escoto pulos mga residente sa Mahiga Creek ug nagrepresentar sa sitio Rosal Neighborhood Association sa Banilad, niadtong bulan sa Enero ning tuiga si Cortes mipahibawo pinaagi ni Arong nga demolison ang 1, 200 ka mga pamilya sa Mahiga Creek nga nailang Philcadan residents.

Apan hatagan sila og kapin sa 17 mil pesos nga financial assistance alang sa relocation site, apan sa ilang alegasyon inay financial assistance ang ilang dawaton gipapirma sila og waiver ni Arong ug Amit aron maoy himuong bayad ang kapin sa P17 mil ngadto kang Lua nga maoy niangkon nga tag-iya sa lote sa relocation site.

Apan ilang nasayran nga ang nahisgutang relocation site sa Paknaan gitumbok sa opisyal sa City Environment and Natural Resources Office nga si Anastacio Cabaljo nga usa ka "timberland" ug usa ka "inalienable and undisposable property" nga nagpasabot iya sa gobiyerno.

Nunot niini ilang gihangyo ang korte nga pugngan ang siyudad sa pagpapahawa kanila tungod sa kalapasan sa siyudad sa Republic Act 7279 ug Memorandum Circular No. 2010-134 alang sa paghatag og relocation sites sa maapektahan sa demolisyon. (BANAT NEWS)