Budget sa mayor gikibhangan

CEBU, Philippines - Gikabalak-an sa pipila ka mga kapitan nga masubli ang disgrasya sa dumptruck nga gigamit paghatud og patay sa lungsod sa Barili tungod sa pagbabag sa konseho sa planong pagpalit og bag-ong sakyanan sa lungsod aron gamiton sa mga kabus nga molupyo sa bukid.

Ang mga molupyo sa kabukiran naglisod na paghatud sa ilang mga minatay diha sa sam-ang sa lungsod tungod kay gidid-an na silang makagamit sa trak sa lungsod tungod sa nahitabong disgrasya kapin usa ka bulan na ang nakalabay nga mikalas og mga kinabuhi sa naghatud sa lubong.

Ang pipila ka mga kapitan nga nagdumili pagpaila sa ilang pangan mitumbok sa 500 mil pesos nga gahin alang sa pagpalit og 4-wheel Isuzu type jeepney nga gisukip ni Mayor Teresito Mariñas sa iyang P83 milyones nga proposed budget sunod tuig.

Si Mariñas mikompirmar usab sa interbyu sa Bantay Radyo nga usa ka libo ka pesos lang sa P500 mil nga iyang gipangayong gahin ang gi-aprobahan sa konseho. Dugang niya nga sa iyang P20 milyones nga proposed budget sa mayors office apil na ang tunga sa milyon pagpalit og sakyanan nga moabot og P8 milyones ang gilaslas sa konseho.

Apil sa gikibhangan sa konseho ang gahin alang sa maintenance sa mga sakyanan sa lungsod alang sa ambulansiya, dumptruck ug ubang sakyanan nga P1.8 milyones apan P500 mil lang usab ang giaprobahan.

Gani matud sa mayor nabalaka siyang masubli ang nahitabong disgrasya ilabi na kun walay tarung gahin alang sa maintenance sa ilang mga sakyanan sa lungsod tungod kay di paigo ang ilang gahin sa maintenance sunod tuig.  

Gidugang sa mayor nga apil sa gikibhangan og maayo ang iyang intelligence fund nga P2.3 milyones nga gihimo nalang P150 mil nga mao say kuhaan sa konsumo sa mga sakop sa Citizen Armed Forces Geographical Unit (CAFGU) nga nagbantay sa kabukiran.

Gisuwayan unta og kontak pinaagi sa telepono sa munisipyo si konsehal Hector Celis ang chairman sa committee on budget sa konseho aron pagkuha sa iyang habig apan wala kini sa iyang buhatan.

Hinuon nagpadayon pa ang budget hearing sa konseho sa ubang mga departamento.  (BANATNEWS)