CEBU, Philippines - Giaprobahan sa konseho sa dakbayan sa Talisay atol sa ilang special session niadtong Biyernes ang annual budget nga P470 milyones alang sa tuig 2012.
Kini human ikapahigayon ang usa ka public hearing niadtong Nobiyembre 15, 201l kalabot sa maong gahin.
Si Konsehal Dennis Basillote nagkanayon nga gamay ra ang kausaban sa maong budget itandi sa gahin ning tuiga tungod kay halos mao ra gihapon ang mga kantidad sa gigahinan niini susama sa gigastohan niining tuiga.
Sa sayo pa si Talisay City Budget Officer Edgardo Mabunay mibutyag nga karong tuiga ang Talisay dunay P300 milyones nga IRA apan gilauman nga sa sunod tuig mokibra kini ngadto sa P294 milyones na lang sumala sa gitakda sa Department of Budget and Management (DBM).
Ang P6 milyones nga usbaw sa sunod tuig nga budget naggikan sa misakang koleksyon sa buhis nga kinitaan sa siyudad.
Ang budget alang sa “confidential” ug “intelligence expenses” ni Mayor Socrates Fernandez nga gigahinan og P4 milyones matag usa, wala kini usbawi.
Apan ang “donations” giusbawan og P3 milyones diin gikan sa P7 milyones niining tuiga sa sunod tuig mahimo na kining P10 milyones.
Gikataho nga ang maong budget maoy gamiton sa mayor sa pagpanghatag ngadto sa mga kabus nga mobisita sa iyang buhatan.
Ang siyudad migahin og P7.5 milyones alang sa garbage collection sa sunod tuig.
Kini walay labot sa P10 milyones nga budget alang sa construction ug rehabilitation sa sanitary landfill.
Ang laing item nga gigahinan og dakung budget mao ang “Mananga Task Force” nga gipangulohan ni Joavan Fernandez nga adunay P4 milyones, peace and order nga gipangulohan ni Bise Mayor Alan Bucao may gahin nga P10 milyones, janitorial services P1.5 milyones, City of Talisay Traffic Operation and Development Authority (CT-TODA) P5 milyones, security services, P6 milyones.
Ang siyudad migahin usab og P4 milyones alang sa honorarium sa nagkalain-laing komitiba kansang chairman pulos mga konsehal nga ubos sa administrasyon.
Ang siyudad migahin og P68 milyones alang sa sweldo sa mga regular nga empleyado ug P480 milyones sa casual o contractual.
Alang sa traveling expenses ang konseho migahin og P4.5 milyones niini. (BANAT NEWS)