SM interesadong paliton ang luna sa MCIA

CEBU, Philippines - Interesado ang kadagkoan sa SM nga paliton ang pwesto   sa kasamtangang Mactan-Cebu International Airport human nila masayri nga dunay mga proposal nga ibalhin ang airport ngadto sa Cordova.

Sa suwat nga gipadala sa SM Prime Holdings Inc. ngadto kang Nigel Paul Villarete, ang general manager sa Mactan-Cebu International Airport   Authority (MCIAA), nagkanayon kini nga ilaha nang nasabtan nga nagkadaghan na karon ang mga pasahero sa eroplano busa maisip nga gamay na lang kaayo ang maong lugar.

Nagkanayon ang presidente sa SM nga si Hans T. Sy nga   andam sila moumol og mga diskusyon ngadto sa mga kadagkoan sa MCIAA alang sa ilang laraw nga   pagpalit sa pwesto sa maong airport.

Nasayran nga kung mapalit na kini sa SM, mahimong matukuran og mga daghang establisamento ang maong dapit ug makamugna og daghang trabaho alang sa katawhan.

Samtang si Kongresista Tomas Osmeña kinsa nakadawat usab og suwat sa SM ming-uyon sa plano sa maong kompanya tungod kay maharuhay na unya ang maong dapit tungod sa mga dalan nga mahimo ug makapalambo sa ekonomiya sa Lapulapu.

Gipanglantawan usab sa kongresista nga haom kaayo ang Cordova sanglit ang area niini sayon ra i-reclaim apan aminado siyang taas-taas pa gyud nga panahon una kini mahitabo apan masaligon siyang makatabang kini dili lang sa ekonomiya sa Sugbu kundili apil na sa mga atraksyon sa tibuok isla sa Sugbo.

Ang pamunoan sa SM midasig usab sa MCIAA nga modestino og usa ka tawo gikan sa planning office sa maong airport nga himuong point person aron mahimo nilang kapasahan sa ilang plano. (BANAT NEWS)