Badlongon napusilan

CEBU, Philippines - Kritikal ang kahimtang sa usa ka 22-anyos nga lalaki kinsa giingong badlongon sa ilang dapit human kini pusila sa wala hiilhing tawo didto sa Zone 5, barangay Biasong, dakbayan sa Talisay sa miaging kaadlawon.

Ang biktima mao si Alexander Abendan, residente sa maong dapit kinsa nakaangkon og unom ka samad pinusilan sa iyang tiyan.

Si SPO1 Mikie Espina ug PO2 Stephen Sefuesca kinsa miresponde sa maong hitabo mibutyag sa Banat News nga ang biktima naglakaw sa karsada paingon sa ilang balay dihang pag-abot sa maong lugar iyang gikasugat ang wala hiilhing kriminal ug way daghang estorya miluthang kaniya makaunom ka higayon.

Matud pa ni Espina   nga makaduha na ka higayong nadakpan niya si Abendan kaniadto sa kasong robbery apan nakagawas   kini sa prisohan sa kalagmitang miatras sa kiha ang mga kihante.

Gibutyag usab ni Espina nga niadtong buwan sa Septembre niining tuiga si Abendan giingong nakapusil sa usa ka ginganlan og Tukor, didto sa dapit diin siya hipusili niadtong Sabado sa kaadlawon.

Usa sa gilantaw karon sa kapolisan nga anggulo sa maong hitabo mao ang panimawos.

Ang biktima anaa karon sa Vicente Sotto Memorial Medical Center sa dakbayan sa Sugbo. (BANAT NEWS)