Parking attendant sa Tabunok, gipusil patay
CEBU, Philippines — Patay ang usa ka 41-anyos nga parking attendant human gipusil sa wala pa mailhing suspek atubangan mismo sa Tabunok Public Market, dapit sa N. Bacalso Avenue, Barangay Tabunok, Talisay City, Cebu, kagabii, Nobyembre 12, 2026.
Giila ang biktima sa alyas nga “Dondel,” residente sa Molave Extension, Barangay Tabunok.
Base sa inisyal nga report sa Talisay City Police, nadawat nila ang tawag gikan sa CT-TODA Command Center pasado alas-6:45 sa gabii kalabot sa pagpamusil.
Pag-abot sa mga nirespondeng pulis, nakit-an ang biktima nga naghigda nga nagbuy-od sa karsada atubangan sa merkado, naligo kini sa kaugalingong dugo ug wala nay panimuot. Gikumpirma usab sa responding Emergency Medical Services (EMS) team nga gipangulohan ni Kervin Castello nga wala nay timailhan sa kinabuhi ang biktima sa ilang pag-abot.
Ang biktima nakaangkon og mga samad pinusilan sa iyang ulo nga maoy hinungdan sa iyang hinanaling kamatayon. Wala na kini madala pa sa tambalanan.
Padayon pa ang imbestigasyon nga gihimo sa kapolisan aron mahibaw-an ang motibo sa krimen ug mailhan ang responsable sa pagpamusil. — /IBM (BANAT NEWS)
- Latest

















