CEBU, Philippines - Samdan ang usa ka tawo human kini pusila sa wala hiilhing criminal nga nagsakay og motorsiklo sa barangay Basak, dakbayan sa Mandaue sa miaging gabii.
Ang biktima mao si Ryan Pasana, 30, ulitawo, nga taga Sector 1, barangay Pagsabungan sa maong dakbayan .
Si SPO2 Danilo Barrita sa kapolisan sa Presinto 3 sa Basak Police Station sa Mandaue City Police Office (MCP0) nga nahinabi sa Banat News miingon nga naglingkod lang ang biktima sa maong dapit nga maoy naandang estambayanan niini panahon sa gabii.
Unya kalit lang gihunongan sa motorsiklo nga giluwanan sa duha ka wala hiilhing lalaki ug ang nag-angkas niini maoy mipusil sa biktima sa makadaghang higayon.
Human mahagba sa yuta ang biktima, misirit dayon pahilayo ang mamumuno pinaagi sa ilang motorsiklo.
Ang biktima nga samaran sa tiyan ug sa pus-on gihatod dayon sa mga tagtungod ngadto sa Mandaue City Hospital apan gibalhin kini ngadto sa Vicente Sotto Mermorial Medical Center sa dakbayan sa Sugbo.
Matud pa ni SPO2 Barrita nga sa crime scene napunitan nila ang mga mga kabhang sa bala nga kalibre 45 ug pipila usab ka mga buhing bala nga gituohang nalagpot dihang giinggansa sa mamumuno ang armas nga gigamit sa pagpamusil.
Si SPO2 Barrita miingon nga duha ka mga anggulo karon ang ilang gisubay nga posibleng maoy hinungdan sa maong pagpamusil nga naggumikan s a giingong kalambigitan sa biktima sa mga pagpangawat ug pagpayuhot sa illegal nga drugas sa maong dapit. (BANAT NEWS)