CEBU, Philippines - Nalandig sa tambalanan ang usa ka tawo human kini pusila didto sa sitio Limonsito sa barangay Umapad, dakbayan sa Mandaue sa miaging adlaw.
Ang biktima mao si Mark Reposo, 27, ulitawo nga lumad nga taga barangay Maguikay ug ang nagpusil mao si Erwin Tagalog, 21 anyos nga taga Limonsito.
Si SPO2 Milven Pelayo sa kapolisan sa Prisento 5 nga nahinabi sa Banat News miingon nga nag-inom ang biktima uban sa mga barkada niini sa sulod sa balay sa kauban niini sa trabaho nga nagpuyo sa maong dapit.
Unya migawas ang biktima nga mopalit pa unta og dugang ilimnon, dihang gisugat siya sa suspek ug gisukit nganong gidaugdaug ang usa ka kauban niini sa trabaho.
Dihang milanit ang suspek sa iyang armas de fuego, midagan ang biktima apan naigo kini sa mga bala dihang gitirohan siya sa makadaghang higayon.
Misibat dayon ang suspetsado human malamba sa yuta ang biktima ug mga barkada na niini maoy mihatod kaniya ngadto sa Mandaue City Hospital.
Padayon pang gipangita sa kapolisan ang suspek. (BANATNEWS)