CEBU, Philippines - Duha sa tulo ka mga suspetsadong tulisan kinsa mipusil ug mitulis sa drayber sa taksi niadtong milabay’ng Lunes sa kaadlawon diha sa sitio San Rafael, barangay San Roque, dakbayan sa Talisay ang misurender na kagahapon sa buntag sa kapolisan sa siyudad.
Ang misurender mao si Ariel Paden, 19, kinsa anak og tanod sa barangay Tanke ug giingong maoy mipusil sa drayber ug ang classmate niini sa elementarya nga si Homer Tradio, 20.
Kahinumduman nga ang ilang kauban nga si Lester Louie Macachor nasikop sa kapolisan niadtong Miyerkules diha sa balay sa iyang amahan sa sitio Kilawan barangay Tanke.
Ang drayber nga nabiktima sa tulo mao si Jimmy Bacaro kinsa naigo sa walang apapangig ug ang bala milahos ngadto sa tuong apapangig.
Gisurender usab sa mga suspetsado ang kalibre .357 nga revolver nga giingong maoy gigamit sa pagpamusil.
Si Supt. Eddie Recamara, hepe sa Talisay City Police Station sa pakighinabi sa Banat News kagahapon mibutyag nga niadtong Biyernes ang mga ginikanan ni Paden iyang gipatawag ug gihangyo sila nga isurender ang ilang anak.
Matud ni Recamara nga si Paden ug Tradio didto mitago sa lungsod sa Clarin sa Misamis Occidental ug gihatagan niya og pamasahe ang magtiayong Paden aron makuha ug madala dinhi sa Sugbu ang ilang anak.
Kagahapon sa kaadlawon naabot dinhi ang magtiayon kauban ang ilang anak.Ang tulo mag-atubang og kasong robbery with frustrated homicide matud ni Recamara.
Si Paden nga nahinabi sa Banat News kagahapon mipasangil nga si Macachor maoy tag-iya sa revolver nga iyang gigamit sa pagpusil sa drayber ug si Macachor usab ang misugo kaniya nga pusilon dayon ang drayber kung mopahinay kini sa taksi dihang ilaha kining gipara.
Matud niya si Macachor maoy mikuha sa sobra sa P3 mil ni Bacaro ug P40 sa duha ka pasahero.
Si Paden nagkanayon gibahin nila kini ug dayon nagbuwag-buwag na sila.
Si Macachor giila sa attendant cashier sa Kyle Gas Station sa lungsod sa San Fernando nga si Randy Matmat nga usa sa duha ka tawo nga nagsakay og motorsiklo nga mitulis kaniya ug nadala ang P17 mil nga halin sa gas station.
Nakagawas si Macachor sa Talisay City Jail niadtong Marso 3, 2011 tungod sa kasong pagpanglabni.
Giawhag usab ni Recamara ang magtiayong pasahero ni Bacaro sa pagkooperar sa ilang kaso isip mga biktima sa tulo. (BANAT NEWS)