Sakop sa media maoy unang pasahero sa E-Jeep

CEBU, Philippines - Mga sakop sa Association of Reporters in Mandaue And Lapulapu In Truth and Excellence o ARMALITE maoy unang nakasubo human sa road test sa upat ka electric jeepney o E-Jeep nga gipalit sa Mandaue nga libreng kasakyan sa mga residente nga mopadulong sa bag-ong merkado.

Matud pa ni Mandaue City Market Administrator Mossulini Soliva nga upat ka E-Jeeps ang libreng kasakyan sa mga Mandauehanon nga mopadulong sa “New Mandaue City Public Market” sa likod nga bahin sa Mandaue City Sports Complex gikan sa karaang merkado.

Ang E-Jeep napalit sa kantidad nga P700 mil matag usa ug gikan sa Xiamen, China. Ang bag-ong merkado pormal nga ablihan karong sunod semana.

Ang E-Jeep ekonomiya ug dili mogamit og gasolina gumikan kay usa kini ka sakyanan nga de-kuryente, kini mahimong padaganon sulod sa walo ka oras nga walay karga-karga sa kuryente.

Ang baterya sa maong sakyanan duha ra ka oras nga i-charge alang sa walo ka oras ang biyahe. Nagtuo si Soliva nga dako ang ikatabang sa maong mga sakyanan sa mga taga Mandaue.

Gitun-an usab sa dakbayan ang posibilidad nga paagian kini og rota sa regular nga pasaheroan aron mas paspas ang pagsulod sa mga mamalitay.

Sa gihimong road test sa Banat news uban sa mga sakop sa ARMALITE nabatyagan nga luwas kini kung ang gikusgon sa pagdagan maoy hisgutan sanglit gilimitahan kini sa kutob lamang sa 40 kilometro matag oras nga may kargang 14 ka tawo.

Samtang gipahibalo ni Soliva nga prayoridad nga makakuha og pwesto sa bag-ong merkado mao kadtong mga karaang manindahay nga dunay pwesto ug kadtong naninda na sa karaang merkado apan wala makakuha og pwesto kaniadto lakip na usab kadtong diniyos kung mobayad sa ilang abangan.

Aron usab dili sila makalitan, dili una sila paabangon sulod sa duha ka bulan sa ilang pwesto. (BANATNEWS)