Mandaue jeepneys makasulod na sa Cebu City

CEBU, Philippines - Seguradong magmaya na ang mga drayber sa Mandaue-Cebu City routes gumikan sa nakab-ot nga kasabutang subli silang paagion sa dalan V.Gullas paingon sa dalan habig sa Cebu Metropolitan Cathedral.

Gibutyag sa executive director sa City Traffic Operations Management (Citom) nga si Rafael Yap nga sugod karong Nobiyembre 28 (Lunes) makabalik na sa pagpamasahero ang Mandaue routes sa maong dapit.

Giklaro hinuon ni Yap nga ang maong rota pay gitugutan apan kadtong PUJ sa Mandaue nga nagbiyahean og Jones Avenue kaniadto dili gihapon puwede nga makaagi sa maong dalan.

Matud pa ni Yap nga kadtong jeepneys sa Mandaue nga moagi og V.Gullas St. kinahanglang mokuha’g ID sa ilang buhatan ug travel line nga gisugdan og release kagahapong adlawa.

Usa pud sa kundisyon sa CITOM sa mga drayber sa rotang 21A, 21D, 22A ug 22D mao nga kinahanglang dili sila magpaugat sa pag-pick up og pasahero.

Si Yap nagkanayon nga ang maong mga pasaheroan sagad magpaugat kaniadto diha sa dalan Urdaneta atubangan sa Cebu Metropolitan Cathedral tungod kay adunay mga badlungong dispatser nga manawag og pasahero ug mao pay mobitad sa mga pasahero sa pagpasakay.

Kini maoy makaingon sa paghuot sa trapiko ilabi na sa adlaw nga Biyernes ug sa Domingo nga diin modagsang ang manimba.

“Dili sila angay magpaugat, kinahanglan motuman gyud sila sa mga traffic rules aron dili mosamot ang traffic,” sumala pa ni Yap .

 Matud pa ni Rama nga magpabilin gihapon ang implementasyon sa City Ordinance 1837 sa habig sa Jones Avenue busa wala gihapoy makasulod nga PUJ sa Mandaue sa maong dapit.

“Sa una katulo ko mosakay, apan tungod ana, kaduha na lang ko mosakay og jeep. Dako na kaayo na og matabang, kay gawas nga naka-save ko, dili na pud ko mahago pag-ayo,” matud pa ni Ereniamae Sayson kinsa nagtrabaho sa usa ka factory diha sa Mandaue sa pakighinabi sa Banat News.(EIM) (BANATNEWS)