Cebu usa ka hot spot sa HIV

CEBU, Philippines - Gikonpirmar sa mga tinugyanan sa panglawas nga misaka karon ang kaso sa sakit nga Human Immunodeficiency Virus (HIV) itandi sa miaging tuig diin kasagarang nabiktima mga kalalakin-an ug karon ang Cebu nahimo nang usa sa mga hot spot sa maong sakit sa tibuok nasud.

Atol sa sinemanang Kapihan sa PIA, si Dr.Chamberlain Agtuca Jr, Assistant Leader sa HIV/AIDS Core Team sa Vicente Sotto Memorial Medical Center (VSMMC) mibutyag nga niadtong tuig sa 2000-2001 adunay usa ka tawo lang napositibo sa HIV matag tulo ka adlaw.

Samtang sa tuig 2010 hangtod ning tuiga misaka kini ngadto sa pito ka tawo ang madiskobrehang positibo sa maong sakit kada adlaw.

Si Agtuca   mihingalan usab sa duha pa ka laing hot spot sa HIV nga mao ang Manila ug ang dakbayan sa Davao.

Sa pagkakaron may 82 na ka kaso sa HIV sa Central Visayas kansang kasagarang mga biktima ania sa Sugbo.

Matud usab ni Agtuca nga ning tuiga 4 ngadto na sa 6 ka pasyente ang ilang matala matag buwan nga maglangkob sa mga pasyente sa Sugbo, Negros Island, Samar ug Leyte.

Gibutyag usab ni Agtuca nga ang VSMMC adunay gipanghatag nga libreng tambal ngadto sa mga pasyente nga nag-antos sa susamang sakit.

Samtang si Dr. Ilya Tac-an, head sa Cebu City Epedimiology and Surveillance Office sa Cebu City Health Office mibutyag nga sugod niadtong buwan sa Enero hangtod sa buwan sa Septembre ning tuiga       adunay natalang 100 ka kaso sa HIV.

Dako kaayo ang kalainan kun itandi niadtong tuig 1999 ngadto sa tuig 2009 nga 95 lang ka kaso ang natala sa maong matang sa sakit.

Midugang usab si Tac-an nga adunay 168 ka HIV positive nga naggamitan og ginadiling drugas pinaagi sa injection diin 122 niini lalaki, samtang 46 ang mga babaye.

Samtang sa sexual transmission adunay 72 ka kaso nga kasagaran mga lalaki nga naigo tungod sa gitawag nga “male to male sex” kon panag-unay nga panaghilawas sa mga lalaki ug lima usab babaye .

Matud pa ni Tac-an nga sa milabay’ng tuig, 50 porsento lang ang nagpositibo sa maong kaso samtang karong tuiga misaka kini ngadto sa 3 porsento diin nahimo na kining 53 na ka kaso ang tanan pinaagi ning maong matang   sa pagpanakod sa HIV.

Mipasabot ang mga doktor nga kasagarang maigo mao ang mga tiggamitan og mga ginadiling drugas tungod sa pagbanus-banos nila og gamit sa injection diin kadtong may dugo nga HIV sayon kaayong makapatakod sa iyang sakit ngadto sa wala pay sakit gumikan sa gitawag nga blood transfusion.

Samtang ila usab nga gipasabot nga ang male to male sex makakuha kini og sakit tungod usab kay wala man silay proteksyon.

Si Johnson Lo, usa ka sakop sa Cebu Plus Organization mibutyag usab nga misaka gayud ang kaso sa HIV, gani naghinay-hinay na kini karon og panggawas tungod usab sa mga tambal nga gipatanyag sa mga tambalanan.(/WC) (BANAT)