Shabu gipalusot sa koral sa Lapulapu City Jail

CEBU, Philippines - Mag-atubang og dugang bug-at nga silot ang usa ka piniriso nga nasakpang midawat sa shabu nga gipalusot sa lungag sa koral sa Lapulapu City Jail kagahapon.

 Si Glenn Dehayco, 36, residente sa barangay Punta Engano, sa dakbayan sa Lapulapu ug nabilanggo gumikan sa kaso sa illegal nga drugas maoy nasakpan sa akto sa jailguard sa prisohan.

Matud pa ni Jail Supt. Gel Aninio, Deputy Jail Warden sa Lapulapu City Jail nga nasigpatan si Dehayco sa iyang tower guard nga miduol sa usa ka restricted area sa compound sa prisohan hinungdan nga nanaog ang tower guard nga si JO1 Aida Baculado.

Dihang nagkaduol na si JO1 Baculado nakita niini nga adunay gisalibay si Dehayco ngadto sa kasagbutan ug   dihang gisusi sa guwardiya nasuta niini ang unom ka gagmay’ng pakete sa gituhoang shabu nga maoy gisalibay ni Dehayco.

Atol sa interogasyon si Dehayco mitug-an nga igo lamang siyang gisugo sa usa ka Eddie Cosep, nga kauban niyang piniriso sa pagkuha sa maong mga pakete sa shabu nga gipalusot sa lungag sa koral sa prisohan.

Matud pa ni J/Supt. Aninio   nga mosamot kabug-at ang kaso nga giatubang   ni Dehayco.(Bong Soriano/WC)  (BANAT)