CEBU, Philippines - Gikinahanglan ang panaghiusa ug paghinigugmaay alang sa pakigbatok sa nasinating krisis karon sa kalibutan matud pa sa mensahe ni Cebu Archbishop Jose Palma sa mga debotos sa Birhen sa Regla sa dakbayan sa Lapulapu.
Usa ka “pontifical mass” ang gipahigayon sa Birhen dela Regla National Shrine sa dakbayan sa Lapulapu atol sa kapistahan niini kagahapon nga gihugopan sa liboang mga debotos dili lang sa Lapulapu kondili lakip ang gikan sa lagyong lugar nga adunay ‘panaad.’
Matud pa ni Palma ang pagtinabangay, panaghiusa sa katawhan dako ang matabang aron malabyan ang krisis nga atong nasinati karon.
Sumala pa niya nga daghan sa mga katawhang Pilipino ang naglisod sa ilang pagpuyo, pagkaon ug panginabuhian nga kinahanglang matabangan pinaagi sa pagpaambit sa uban.
Hinuon atol sa maong misa wala mohisgot si Palma sa isyu kalabot sa kasamtangang administrasyon bisan pa sa presensiya sa mga opisyales sa dakbayan sa Lapulapu nga mitambong sa maong misa. (BANATNEWS)