CEBU, Philippines - Gidayeg sa mga molupyo sa dakbayan sa Talisay ang maayong performance nga gipakita karon sa kapolisan sa maong dakbayan.
Si Edith Cahilap , 36, principal sa Biasong Elementary School nagkanayon nga tulo ka mga dagkong krimen sa dakbayan nga nakapaislag sa mga katawhan kaniadto sa pagkakaron nasumpo na.
Kini mao ang budol, fraternity ug ang mga tulis sa taxi, matud pa ni Cahilap.
Gumikan niini dili na kaayo siya mabalaka sa iyang kaugalingon ug sa iyang mga estudyante ingon man mga molupyo sa dakbayan kun magpadayon kining maayong mga lihok nga gipakita sa ilang kapolisan sa pagbantay sa kalinaw ug kahusay sa dakbayan.
Ang maong pamahayag ni Cahilap maoy iyang reaction sa namantala na sa Banat News nga mauswagong kahimtang sa kalinaw ug kahusay sa dakbayan sumala sa natala nga record sa kapolisan sa maong dakbayan.
Base sa talaan sa krimen sa kapolisan gikan sa Enero 1, 2011 hangtud Septiyembre 30, 2011 ang Talisay adunay 520 ka mga krimen diin gilangkoban kini sa 333 ka index crime, 108 ka non-index crime ug 87 ka other non-index crime.
Ang index crime o “crime against person and properties” gilangkoban kini sa theft, robbery, homicide, physical injury ug rape. Ang non-index crime o “special law” gilangkoban kini sa ginadiling drugas, illegal logging, fishing ug uban pang balaod sa pagpreserba sa kalikopan.
Sa maong mga buwan ang crime solved o nasulbad nga kaso mikabat sa 197, crime cleared o wala masikop ang suspetsado apan napasakaan og kaso mikabat sa 117 ug 141 ka unsolved crimes o wala masulbad nga mga krimen.
Sa maong mga buwan usab ang siyudad adunay 61.26 porsyento nga Crime Solution Efficiency ug 33.92 porsyento nga Average Monthly Crime Rate (AMCR) o gidaghanon sa krimen matag buwan.
Niadtong Enero 1, 2010 hangtud Septiyembre 30, 2010 ang gidaghanon sa krimen sa Talisay mikabat sa 576 nga gilangkoban sa 411 nga index crime, 71 non-index crime ug 94 ka other non-index crime.
Ang napasakaan og kaso sa korte mikabat sa 180, crime cleared, 101 ug 188 ang unsolved crime. (BANAT NEWS)