CEBU, Philippines - Patay nang napalgan ang usa ka mag-uuma nga naglutaw sa sapa sa bukirang bahin sa barangay Tulang, sa lungsod sa Argao niadtong Biyernes sa gabii.
Ang biktima kinsa gituohang nalumos kay dili kaantigo molangoy nailhan nga si Jestony Panerio, 21 anyos, minyo, ug molupyo sa nahisgutang lugar.
Si PO2 Ken Cabrera sa Argao Police Station mibutyag sa Banat News nga sumala sa mga kabanay sa biktima nanguha og kumpay sa hayop ang naulahi niadtong Miyerkules apan wala na kini mahiuli. Gipangita nila kini niadtong tibuok adlaw’ng Huwebes ug Biyernes, apan nianang alas 6:00 na sa kagabhion niadtong Biyernes may namatikdan ang mga silingan nga bahong patay sa usa ka bahin sa sapa.
Dihang ilang gisusi, didto nila hipalgi ang patay’ng lawas sa biktima nga naglutaw sa sapa nga mibutod na ug baho na kaayo.
Gituohan sa kabanay nga naligo sa sapa ang biktima ug tungod kay dili kaantigo molangoy nalumos kini nga maoy hinungdan sa iyang kamatayon.(/WC) (BANATNEWS)