CEBU, Philippines - Patay nang nadiskubrehan kagahapon sa buntag ang usa ka gwardiya nga gituohang gitabangan og hapak og bato ug gidunggab sa wala pa hiilhing mga kawatan sa sulod sa establisamentong iyang gibantayan sa barangay Pitogo, lungsod sa Consolacion.
Ang biktima mao si Harold Montecalvo, 23, taga lungsod sa Sogod ug nadestino sa pagbantay sa Alphaz Export Corporation nga nahimutang sa nahisgutang dapit sa lungsod sa Consolacion.
Si SPO1 Francis Villamor sa Consolacion Police Station nga nahinabi sa Banat News miingon nga ang relibo nga gwardiya nga si Dennis Ibale, maoy nakadiskubre sa patay’ng lawas sa biktima nga nagbuy-od na sa sulod sa ilang guard house sa gibantayan nilang establisamento.
Dugang pa niya nga sa ilang gihimong pakisusi sa patay’ng lawas sa biktima daghan kini og mga samad dinunggaban sa kalawasan.
Nagtuo silang nakabantay pa ang biktima sa miatake kaniya ug misuway og sukol apan gilupig maong nadunggaban kini sa makadaghang higayon.
Matud pa ni Villamor nga ang mga sakop sa Scene on Crime Operation (SOCO) sa PNP Crime Laboratory nga misusi sa lawas sa biktima nagdudang gihapak sad og bato ang biktima sa wala pa kini dunggaba.
Gipangita karon sa kapolisan ang service revolver sa biktima nga usa ka kalibre .38 nga gituohang gikuha sa mga kawatan.
Sa gihimo nga pakisusi sa mga butang sa sulod sa compound nahanaw na ang pipila ka mga engine chassis sa Isuzu elf nga sakyanan.
Padayon pang nangita ang kapolisan og testigo sa maong krimen aron pagtumbok sa mga mamumuno.(/EIM) (BANATNEWS)