May kakulian sa utok gitadtad og bala

CEBU, Philippines - Usa ka lalaking gituohang may deperensya sa pangisip ang napalgang patay nga may daghang samad pinusilan sa kalawasan kagahapon sa buntag diha sa kasagbutan sa barangay Cahumayan sa dakbayan sa Danao.

Si PO1 Faron Avila miila sa biktima nga mao si Dario Gonzales, 40, nagpuyo sa maong dapit kinsa giingong adunay kakulian sa pangisip sa maong dapit ug giingong manghilabot sa mga butang sa mga silingan.

Matud pa ni Avila ang barangay kagawad nga si Gerardo Dayon sa barangay Cahumayan maoy nagpahibalo labot sa pagkakaplag sa patay’ng lawas sa biktima.

Sa pagsusi sa kapolisan aduna kini daghang samad pinusilan sa tuong dughan, tuong abaga ug uban pang bahin sa lawas nga gituohang nakaingon sa kamatayon niini,

Base sa impormasyong ilang nakuha sa mga silingan niini giingong manghilabot kini sa mga butang sa laing tawo sa ilang dapit nga gituohan gumikan sa kakulian niini sa pangisip.

Nagduda karon ang mga polis nga posibleng silingan ra sa biktima ang kriminal nga nasad-an sa biktima. (BANAT NEWS)