Vigilante milihok - comendador

CEBU, Philippines - Tungod sa kahinay sa dagan sa hustisya dinhi sa Sugbo maoy hinungdan nga kumkomon na lang sa tawo ang balaod, sumala pa ni Sr. Supt. Patrocinio Comendador, ang hepe sa kapulisan sa probinsya sa Sugbo.

Kini maoy reaction ni Comendador sa mga balita nga giingong milihok na usab ang mga vigilante dinhi sa Sugbo, sumala sa ilang gipakita sa nagsunod-sunod nga pagpamatay nila sa lima ka mga tawong adunay bug-at kaayong mga record nga kriminal.

Sumala pa ni Comendador nga sa vigilante-style killing daghan ang dili makaayon niini apan tungod sa kahinay sa dagan sa hustisya diin ang mga biktima mapul-an na og pinaabot kanus-a ipakanaog sa hukmanan, kasagaran ang uban makahuna-huna na lang   sa pagpangita og kaugalingon nilang paagi.

Gidugang ni Comendador nga sa pagka karon wala pa siyay na-monitor sa probinsya sa Sugbo nga mga gipangihaw sa mga vigilante, sukwahi sa mga nahitabo dinhi sa dakbayan.

Si Comendador, kinsa maoy kanhi hepe sa Cebu City Police Office (CCPO) mitataw nga ang mga vigilante maoy gipasanginlan sa mga sakop sa gang nga gipamatay, apan sa resulta sa imbestigasyon sa kapolisan nasuta nga may kalambigitan sa negosyo sa ginadiling drugas ang kamatayon sa mga badlongon sa katilingban.

Ang giingong mga vigilantes gikatahong sakop usab sa kapolisan nga gibansay og maayo ug may madawat nga bayad kun makapatay sila og mga kriminal kaniadto sa pipila na ka tuig nga milabay.

Matud ni Comendador ang pinatyanay karon dinhi sa dakbayan sa Sugbo maoy magsilbing warning sa mga inilang miyembro sa gang nga nalambigit sa negosyo sa gidiling drugas.

Sa dihang gipangutana siya kun nibalik na ba ang vigilantes dinhi sa Sugbo, si Comendador mitubag nga malagmit adunay mga tawo nga gustong mokumkom na lang sa balaod tungod sa kalangay sa dagan sa hustsiya.

Matud pa niya nga bisan kun ang usa ka suspetsado gikatahong gipusil sa usa ka polis, apan ila kining imbestigahan aron makab-ot ang hustisya sa pamilya sa biktima ug paghatag og katagbawan sa nagpaniid nga   katawhan.(/WC)  (BANATNEWS)