Fluvial procession malinawon

CEBU, Philippines - Mitakdo sa ika-11 nga kasumaran karong bulan sa Nobiyembre, 2011 ang pagpahigayon og fluvial procession o 11-11-11 sa mahal nga patron sa dakbayan sa Lapulapu ang Birhen sa Regla. Base sa obserbasyon ni Lapulapu City Tourism Commission Chairman Damian Gomez nga malinawon ug malampuson ang maong fluvial procession kagahapon sa buntag isip unang pagbukas sa siyam ka adlaw nga nobenaryo sa kapistahan sa Birhen sa Regla.

Pormal nga gisugdan ang fluvial procession pinaagi sa usa ka misa sa Brgy. Marigondon Parish church uban ni Fr. Boy Asister ug gidala kini sa Pacific Cebu Resort ang Birhen diin didto nanukad ang maong fluvial procession mga alas 7:00 kagahapon sa buntag.

Mikabat sa 70 ka mga dagko ug gagmay’ng pumpboat ang misalmot sa maong procession gikan sa Brgy. Marigondon agi sa Brgy. Agus, Maribago, Mactan, Punta Engaño ug deretso sa Muelle Osmeña Wharf diin gikanaug ang imahen sa Birhen sa Regla mga alas 9:30 kagahapon diin gisugat kini sa mga opisyal sa dakbayan sa Lapulapu uban ni Lapulapu City Mayor Paz Radaza ug mga konsehal sa dakbayan sa Lapulapu. Atol sa maong procession nakasugat ug ginagmay nga problema dihang usa ka pumpboat ang mipadaplin sa baybayon sa Brgy. Maribago gumikan kay adunay usa ka pasahero niini ang giatake ug nawad-an og panimuot.

Apan bisan pa niini mapasalamaton si Gomez nga base sa taho ni Lapulapu City Police Office Director P/SSupt. Anthony Obenza walay mga dagkong disgrasya sa kadagatan ug krimen nga nahitabo sa palibot sa dakbayan sa Lapulapu nunot sa maong kasaulogan.

Gikan sa pagbiya sa imahen sa Birhen sa Marigondon ug pag-abot niini sa simbahan sa Birhen sa Regla gidugukan kini sa liboan ka mga debotos niini ug atol sa misa nga gipahigayon ni Fr. Jaime Duero ang kura paroko sa Birhen sa Regla Shrine diin sentro sa mensahe niini mao ang pagtambayayong sa mga opisyal ug mga Oponganons alang sa kalambuan sa dakbayan.

Kahinumdoman nga mokabat na sa 276 ka tuig dihang miabot sa dakbayan sa Lapulapu ang imahen sa Birhen sa Regla gikan sa nasud sa Espana ug gidala ni Fr. Aballe usa ka Agustinian nga pari niadtong tuig 1735.

Ang fluvial procession anaa na sa ika-11 ka tuig sa pagpahigayon niini human kini gisugdan niadtong tuig 2000 diin ginuntan kini sa mga debotos sa Birhen sa Regla nga nagagikan sa nagkalainlaing dapit dinhi sa nasud. (BANATNEWS)