CEBU, Philippines - Milampos na usab ang mga sakop sa Criminal Intelligence Branch (CIB) pagsikop sa usa ka drug pusher atol sa buy bust operation sa sitio Lumar sa barangay Lorega San Miguel siyudad sa Sugbo sa miaging gabii.
Ang suspetsadong nasikop mao ang ilado na kaayong si Efren Coyoca Jr. 40, alyas ‘Badjok’ kinsa anaa usab sa ilang listahan nga nalambigit sa negosyo sa ginadiling drugas.
Si Chief Insp. Romeo Santander, hepe sa CIB sayo niini mimando dayon sa iyang mga sakop nga panid-an si Badjok human sila makadawat sa report kalabot sa presensya niini sa maong lugar.
Niadtong Miyerkules sa alas-10 sa gabii gipahigayon na ang buy bust operation batok sa suspetsado ug ang gihimong pusuer buyer mao ra sab ang usa ka polis uban sa ilang confidential agent.
Ilang gipalitan og usa ka libo nga kantidad sa shabu si Badjok ug sa dihang gidawat niini ang kuwarta dungan sa pagtunol sa shabu ngadto sa polis, dihadiha gisikop dayon nila. Nakuha gikan sa suspetsado ang usa ka medium pack nga may gidudahang sulod nga shabu.
Si Coyoca anaa karun gitanggong sa detention cell sa CCPO sa Camp Sotero Cabahug ug gikatakdang pasakaan og kasong kalapasan sa Section 5, Art. 2 of R.A 9165. (BANAT NEWS)