Inahan sa giluwas nga 7-buwan bata gipangita

CEBU, Philippines - Padayong gipangita sa mga tinugyanan sa Department of Social Welfare and Development –Region 7 ang inahan sa bata nga giingong gipasagdan sa nagpailang amahan niini nga si Cyprian Artajo, 25, ug naluwas sa mga opisyales sa barangay Kasambagan ning dakbayan sa Sugbu.

Sumala pa sa information officer sa DWSD nga si Jaybee Binghay nga importante kaayo ang presensiya sa inahan sa bata sanglit atua man sa Vicente Sotto Memorial Medical Center (VSMMC) si Artajo tungod kay gituohang aduna kini deperensiya sa pangisip.

Kahinumduman nga gi-rescue sa mga opisyales sa Barangay Kasambagan ang pito ka buwan nga batang ginganlan og Christian gumikan kay giingong pisikal kini nga giabuso base sa mga nakitang mga samad nga una nilang gidudahang paso sa sigarilyo.

Apan matud pa ni Binghay base sa paghiling sa mga doktor sa maong bata nasuta nga dili mga paso kundili pinaakan sa mga insekto ang mga samad niini.

“Ang panit sa bata, daghan kaayo og pinaakan sa insekto, puwede mapasakaan og kaso ang amahan sa bata gumikan sa pagpabaya niini. Mao na ang atong tun-an ron kay tua pa man sa hospital ang amahan,” sumala pa ni Binghay.

Ang bata naa karon ubos sa kustodiya sa DSWD samtang gipangita pa nila ang inahan niini. Dugang pa niya nga nakapaduda kaniya kung si Artajo ba gyud ang amahan sa bata gumikan kay dili kini makatubag sa mga batakang impormasyon kabahin sa bata parehas nalang anang mag-lainlain ang petsa nga gihatag niini kung kanus-a natawo si Christian.  

Si Artajo giingong lumad nga taga Villa Hermoso, Negros Occidental nakapaukay sa katawhan sa Kasambagan sa miaging adlaw sa dihang gibutang niini ang bata kilid sa dalan ug giwara-wara pa gyud kini hinungdan nga dunay mga concerned citizen nga nanawag sa barangay.

Gusto unta ni Artajo nga kuhaon pagbalik ang bata apan wala na mosugot ang DSWD aron maseguro ang kaluwasan sa bata. (BANATNEWS)