2-anyos gidudahang namatay sa meningo

CEBU, Philippines - Usa ka 2-anyos nga batang lalaking taga lungsod sa Dumanjug ang namatay niadtong nakalabay’ng Martes nga gilubong dayon sa pagkahapon human gidudahan nga natakboyan sa sakit nga meningococcemia.

Kung makumpirmar man, mao pa kini ang labing unang namatay sa maong matang sa sakit sa maong lungsod nga molupyo sa barangay Canyuco.

Sumala pa nga ang bata gihilantan niadtong Lunes ug gidala dayon sa Dumanjug District Hospital apan tungod sa mga sintomas nga gipakita sa pasyente sama sa meningococcemia girekomendar kini dayon pagbalhin sa Vicente Sotto Memorial Medical Center (VSMMC).

Apan samtang nalandig sa VSMMC ang pasyente namatay gyud kini niadtong Martes.

Matud sa usa ka kasaligang tinubdan nga nagtrabaho sa munisipyo sa Dumanjug ug silingan sa biktima nga nagdumili pagpaila sa pangalan nga ang biktima gilubong usab dayun nianang pagkahapon sa Martes didto sa sam-ang sa barangay Bitoon.

Gihimo kini aron masigurong wala nay laing matakbuyan kung tinuoray man nga meningococcemia ang sakit niini. Ang maong sakit makatakod pinaagi sa ginhawa sa nasakit niini, sagad sa sintomas magsugod sama sa ordinaryong hilanat, sakit ang tutunlan apan paspas kaayo ang pagkaluya sa pasyente.

Aduna say manggawas nga pula-pula sa panit ang magrabehan niini.

Ang mga ginikanan sa bata midangop sa buhatan ni Mayor Nelson Garcia niadtong Miyerkules aron sa pagpangayo og tabang.

Samtang gibutyag sa hepe sa Provincial Health Office Dra. Cristina Gianggo dihang na-interbyu sa mga tigbalita nga mipadala na sila og mga tawo sa maong lugar aron pagsusi sa hitabo.

Matud ni Giango gipaabot pa usab nila karun ang resulta sa eksaminasiyon sa nakuha nga blood sample sa pasyente dihang nalandig kini sa VSMMC alang sa kompirmasyon.(EIM) (BANATNEWS)