Vendors sa lagtang market mitiyabaw

CEBU, Philippines - Human sa duha kapin ka buwan gikan gibalhin ang merkado publiko sa dakbayan sa Talisay diha sa barangay Lagtang mireklamo karon ang mga vendors sa kagamay gyud sa ilang kinitaan kumparar kaniadtong sa barangay Tabunok pa ang merkado publiko.

Kahinumduman nga ang merkado publiko sa Tabunok gisirado niadtong Agosto 28, 2011 ug ang mga manindahay gipabalhin ngadto sa bag-ong merkado diin kapin sa duha na ka buwan na ang nakalabay karon.

Si Talisay City Administrator Richel Bacaltos nga nahinabi sa Banat News kagahapon nagkanayon nga kung masulbad na ang problema sa traysikol posibleng mokusog na ang halin ngadto sa bag-ong merkado.

Kini maoy unang nakit-ang rason sa siyudad nganong naapektahan ang bul-og sa mga mamalitay nga mangadto sa merkado sa Lagtang sanglit sagad sa mga traysikol nagdumili paglahos didto.

Ang mga drayber sa traysikol sa ilang bahin mireklamo sad nga gipapahawa sila sa daan nilang terminal sa karaang merkado sa Tabunok dungan sa pagpasira niini niadtong milabay’ng bulan sa Agosto.

 Matud nila nga kasagaran ang mga pasahero anha ra manaog sa Tabunok ug usa o duha lang ka pasahero ang molahos ngadto sa merkado sa Lagtang.

Ang siyudad miinsister nga kalapasan sa ordinansa ang pagbutang og terminal sa mga traysikol sa Tabunok tungod sa grabeng traffic nga namugna niini kaniadto pa.

Ang nahitabo karon, adunay mga traysikol nga magmagahi gyud nga kutob ra sa Tabunok ang biyahe ug saluron sa ubang traysikol pangadto na sa Lagtang Market butang nga gireklamo na usab sa mga pasahero kay maduble ilang plete.

Ang minimum nga pletehan karon sa mga traysikol sa siyudad P8 sulod sa tulo ka kilometro ug laing dugang mga piso kun molapas niini, wala toguti ang mga drayber nga mangayo og dobleng pletehan. (BANAT NEWS)