SK Chairman sa bogo mireklamo vs 2-ex police

CEBU, Philippines - Usa ka Sanguniang Kabataan (SK) chairman sa usa sa mga barangay sa dakbayan sa Bogo ang nagkurog sa kahadlok nga misumbong sa kapulisan kauban ang iyang duha ka barkada tungod sa giingong pagpanion kanila og armas sa duha ka mga kanhi polis diha sa barangay Calidgid Bogo niadtong Huwebes sa alas 11:00 pasado na sa buntag.

Ang mireklamo mao si Mark Jason Calidgid,18, SK chairman sa maong barangay ug anak ni barangay kapitan Marilyn Calidgid, uban niya ang mga higalang sila si Elgen Del Carmen, 23, ug Joseph Velasco Imelda, 21, pulos mga molupyo sa maong lugar.

Samtang ang ilang gipasanginlan nga nanion kanila mao ang retiradong polis nga si Constancio Cueva nga maoy chief security sa Bogo City Hall ug kauban niini nga laing retiradong polis nga si Clodualdo Togonon alyas Eddie sakop sa Barangay Peacekeeping Action Team (BPAT) ug laing usa ka kauban nga wala mailhi sa mga biktima.

Matud ni PO2 Joseph Salvador, imbestigador sa Bogo City Police Station dihang nahinabi sa Banat News ang mga biktima alas 3:00 na sa hapon midangop ug misumbong kanila sa nahitabo.

Si Kapitan Calidgid nga inahan ni Mark Jason dihang nahinabi sa Banat News miingon nga iyang gisugo ang iyang anak pagpabayad sa kuryente alas 11:00 sa buntag tungod kay duna siyay importanteng meeting sa sitio Acasia niadtong tungura.

Apan nakugang nalang siya dihang gitawagan sa iyang anak alas 12:00 pasado na sa udto nga nagkurog pa sa kahadlok nga nagpahibawo nga gitionan sila og armas sa mga suspek.

Si Mark Jason mibutyag nga pag-abot nila duol sa pinuy-anan sa kanhi kagawad nga si Loloy Horbisi nakit-an nila ang yellow nga multicab ug gipara sila niini.

Matud ni Mark Jason gipangutana sila kun asa paingon ug iyaha usab kining gitubag nga paingong magbayad og kuryente ug diha-diha nanaug sa multicab si Cueva nga kalit lang nibunot sa pistola dayung tion niini ngadto kanila.

Tungod sa kahadlok nila ang usa sa iyang angkas nga si Imelda mikanaog samtang siya tungod sa kahadlok gipabulhot niya ang motor pahilayo ug nabilin si Imelda kinsa giingong mao na usab ang gitionan hinungdan nga mikaratil usab kini og dagan balik sa ilang pinuy-anan. Matud ni Mark Jason didto na siya mohunong pagpabulhot sa motor sa pikas barangay ug didto iya dayung gitawgan ang iyang inahan ug pagkahuman milahos sila sa police station.

Matod ni Kapitan Calidgid mopasaka gyud sila og kaso batok sa mga nanion sa iyang anak ug mga higala niini.

Ang balay sa kapitan una nang gironda ang pinuy-anan niini niadtong milabay’ng bulan sa Mayo ug nakuhaan sa mga polis og kalibre .45 nga pistola ug granada nga gikwestyon sa kapitan tungod kay giingong ‘planted’ ang mga ebidensya.

Gani ang maong kaso pagkakarun pending pa sa Regional Trial Court (RTC) sa Bogo apan gibasura ang kaso kabahin sa granada.

Nasayran nga si Kapitan Calidgid maoy bugtong oposisyon sa maong siyudad nga kontra partido in Bogo City Mayor Celestino Junie Martinez tungod kay kaalyado kini ni Kongresista Benhur Salimbangon.(EIM)   (BANATNEWS)