Gubat o sabot?

Buloy: Bitoy unsa kahay maayong buhaton sa gobiyerno sa MILF gubat o sabot?

Bitoy: For the good of the many Loy alang nako sabot.

Buloy: Peace advocate gyud ka Toy da, unsa may sabotan?

Bitoy: Kanus-a maggubat. (Toink!/Aguy).

Hehehehehehehehe!

Nganong sa tanang Presidente sa nasud si Presidente Joseph Ejercito Estrada mao ra may nangisog pagdeklarar og gubat sa Moro Islamic Liberation Front?

Kay usa no ka higayon atol sa engkwentro.

Erap: (nisinggit) Ihinto ang potokan mag-ceasefire tayo, Ceaseeeeefire!.......

MILF: Papayag lang kami kung espelingin mo ang ceasefire.....

Erap: Ituloy ang giyeeeeera............... (Toink!).

Komedya man o yagayaga alang nako angayang kalimtan una ni PNoy nga makamao siyang moespeling sa pulong ceasefire o negotiation.

Sa kataas sa panahon sa pagpangharas nabadlong lang ang pagpanghasi sa mga sakop sa MILF diha sa Mindanao dihang gitinuod sa administrasyong Estrada ang pagpuhag sa ilang pundok.

Kun nganong wala mahingpit ang pagpulbos sa MILF sa panahon ni Erap natural lang, kay maayo man sab niyang pagkasyat sa taro. Kun nahinumdom mo ang demanda sa MILF sa abli pa ang sabot sabot tali sa gobiyerno nga napanonod ni Estrada sa administrasyon ni Presidente Fidel V. Ramos. Buot ang MILF nga mahimong Independenteng Estado sa mga Moros sa atong nasud.

Nagpasabot ba nga abli sa maong posibilidad ang administrasyon ni PNoy sa iyang tinguha nga dili masirado ang lakang sa negosasyon?

Uyon hinoon ko sa mando sa Presidente nga angayang sublion pag-ayag sa armadong kusog sa nasud ang ilang mga estratehiya sa siguridad.

May ceasefire man o wala kinahanglang dili molugak ang militar ilabi na sa mga lugar nga tataw ang peligro.

Sa gubat, gawas sa mga kinabuhi nga mausik mahimong mohubas ang panudlanan sa gobiyerno nga makaapektar sa mga nag-unang panginahanglan sa nasud.

Wala pay labot sa kinawatay sa pundo nga dili mawala panahon sa giyera.

Apan sa kataas na sa panahon sa negosasyon, hangtod asa kutob ta nga magpaabot nga mapuwak lang ang kinabuhi sa atong mga sundalo sa walay tino nga sangpotanan sa kalinaw? 

Unsay sukdanan nga dili nata makigsabot kay hapit na mahurot ang mga sundalo og kamatay tungod sa ceasefire?

Basin unya og ang atong gobiyerno mahisama ining maong sugilanon.

Bitoy: Sir sulngon nato sila kay 11 ta unya 10 ra sila.

Buloy: Ayaw, ipakita nato nga makigsabot ta, kasabot?

Grupo: Yes Sir.

Bitoy: Sir gipatay atong 3 ka sakop, 8 na lang ta 10 gihapon sila.

Buloy: Ipakita nato nga andam tang makigsabot, kasabot?

Grupo: Yes Sir.

Bitoy: Sir gipatay nila ang 4 natong kauban 4 na lang ta 10 gihapon sila.

Buloy: Mao ba, sobra na sila... sulngon nato sila, kasabot?

Grupo: Solohaaaaa Sir.(Toink!/Ayay!)

Dili sa tanang panahon ang sabot-sabot maoy mopahamtang sa hingpit nga kalinaw.

(emailad:[email protected])